Shillong, Jylliew 17
Ka ‘Miss Meghalaya Organisation’ hapoh ka jingkyrshan jong ka Meghalaya Tourism Youth Development Society (MTYDS) ka la pynbna ïa ka samla Chaivalry Lartang kum ka nongjop jong ka ‘Miss Universe Meghalaya 2025’.
Kane ka samla mynta kan mihkhmat ïa ka Jylla ha ka rynsan ïakob ‘thei bhabriew ba pawnam ka ri – ‘Miss Universe India 2025’.
Ïa ka ‘State-Level Selection’ la pynlong ha ka 14 tarik u Jylliew, 2025, ha Hotel Vivanta, Khyndailad, Shillong, ha ka jingïakhun kaba ïakhaid bad kaba la sakhi ïa ka jingïashim bynta jong kiba bun ngut ki ‘riew don sap na kylleng ka Jylla. Ïa kane ka prokram la pynlong lang da ka MTYDS bad ka ‘Miss Universe India’.
Ka kynhun ki nongbishar ka kynthup ïa u Amjad Khan, Director ka Franchise Operations na ka bynta ka ‘Miss Universe India’; Aqsa Varghese, ka ‘Miss Universe Kerala, 2024’ bad ka samla Irene Dkhar, ka ‘Miss Tourism India’.
Ka samla Chaivalry, kaba hashuwa ka la ïoh ïa ka kyrdan ‘1st Runner-Up’ ha ka ‘Miss Meghalaya 2024’, ka la pynhun ïa ki nongbishar da ka jinglong ba jai-jai, ka jingskhem jingmut, bad ka jinglong ba khring jong ka.
Ha kajuh ka por, kan sa sdang ïa ka jingshah hikai ha Delhi katba ka pynkhreh ban ïashim bynta ha ka rynsan ïakop jong ka ri ha ka ‘Miss Universe India 2025’.
Kane ka long ka kyrwoh na ka Secretary Communications, ka Iba Wriang.
