Shillong, Jylliew 17
Ka kynhun ki nongsiat pistol bad suloi jong ka ri India ki la lah ban pynpaw ïa ka jingtbit ha ka ISSF World Cup 2025 kaba dang shu kut shen ha Munich, ha kaba ka la khur saw tylli ki takma; ar tylli ki takma ksiar bad ar tylli ki takma rnong.
Kane ka jingjop ka la pynlong ïa ka India ban poi ha ka kyrdan kaba lai ha ka thup kheiñ poiñ jong baroh ki ri kiba la wan ïashim bynta, kata hadien ïa ka China bad ka Norway.
Ka jingïoh khur takma ka India ka la sdang na ka nongïalehkai Olympic ka Elavenil Valarivan, kaba la khur ïa ka takma rnong ha ka 10m air rifle jong ki kynthei. Kane ka nongïalehkai, 25 snem ka rta, ka la pyni ïa ka jingtbit da kaba ïoh 231.2 poiñ ha ka phainal. Kham mynshwa ha ka lympung ïaknieh rung, ka Valarivan ka la thaw ïa ka rekod thymmai jong ka ri da kaba ka la ïoh 635.9 poiñ.
Kawei pat ka takma rnong ba la khur biang da ka India ka dei lyngba ka Sift Kaur Samra ha ka 50m rifle 3 kyrdan jong ki kynthei. Kane ka ‘thei ïalehkai, 23 snem ka rta, kaba bat ïa ka rekod ha ka pyrthei ha kane ka jingïalehkai ha ka Asian Games 2022 da kaba ka la ïoh 469.6, ka la lah ban pynurlong ïa katei ka kyrdan da kaba ka la ïoh 453.1. Kane ka jingjop ka long hadien ka jingïoh ïa ka takma ksiar jong ka ha kajuh ka kyrdan ha ka ISSF World Cup Buenos Aires 2025 kaba la long dangshen mynta u snem.
Ïa ka takma ksiar kaba nyngkong na ka bynta ka ri India ha kane ka lympung la ïoh da ka Suruchi Singh ha ka 10m air pistol jong ki kynthei. Kane ka ‘thei ïalehkai ba 19 snem ka rta ka la pyni ïa ka jinglong ba shlur, da kaba ïoh 241.9 ha ka phainal. Kane ka dei ka takma ksiar kaba lai sien lynter jong ka Suruchi ha ka ISSF World Cup mynta u snem, hadien ba mynshwa ka la jop ïa ka takma ksiar ha baroh ar tylli ki jingïakhun ha Buenos Aires bad Lima.
Ïa kawei pat ka takma ksiar jong ka India la khur da u Arjun Singh Babuta bad ka Arya Borse ha ka 10m air rifle mixed team. Kine ki nongïalehka ka ri ki la lah ban pyni ïa ka jingïalehkai kaba itynnad bha ha ka phainal, ha kaba ki la lah ban pynliem ïa ki arngut ki nongïalehkai jong ka China, ka Wang Zifei bad u Sheng Lihao da 17-7.
Kawei pat ka jingïakop jong ka ISSF World Cup 2025 kan long ha Ningbo, China ha u Nailur mynta u snem.
