Kananaskis, Jylliew:
U Myntri Rangbahduh ka India, u Narendra Modi, u la ioh ban iakynduh ia ka President ka Mexico, ka Claudia Sheinbaum Pardo bad u la ai khublei ia ka halor ka jingkyrshan jong ka Mexico ia ka ri India ha ka jing-iakhun jong ka India pyrshah ia ki kam thombor jong ki lehnoh.
Ha ka jingïakynduh jong ki ha ka jingïalang jong ka G7 ha ka Sngi Ba-ar, u PM Modi u la ai khublei ïa ka Sheinbaum halor ka jingjop ba kongsan jong ka ia ka ilekshon dang shen, ha kaba, ka la ioh ban long ka President kynthei ba nyngkong eh jong ka ri Mexico hapoh jong kine ar spah snem. Kane ka dei ruh ka sien iakynduh kaba nyngkong hapdeng jong kine ar ngut nongialam jong ka India bad Mexico.
Namar kumba la iohi hi ia kaba la jia ha kine ki khyndiat bnai ba la leit, ka India ka la leit thombor bad pynhiar kput ia ki ktem jong ki lehnoh ka Pakistan ha kylleng jong ka Pakistan bad ha ki thaiñ Kashmir ba hap hapoh ka jingkhmih bad jingsynshar jong ka Pakistan, hadien ka jingshah thombor jong ki riew paidbah ka ri India ha Pahalgam ha ka 22 tarik u Lber, kaba la shim ia ka jingim jong ki 26 ngut ki nong India ha katei ka por.
Ha kane ka jingïakynduh, kine ki arngut ki nongïalam ki la ïasam jingmut ruh halor ki mat ba kongsan ha ka pyrthei bad ha ka thaiñ bad ki mat ba kongsan jong ka Global South.
Shuh shuh la ong ruh ba kine ar ngut ki nongialam ki la pynkynmaw bad pynskhem shuh-shuh ia ka jingiadei para-lok kaba la don lypa hapdeng ka India bad ka Mexico naduh ki por barim bad kumta ruh ki la iamynjur ban iatreilang bad ban nang pynïar shuh-shuh ïa ka jingïadei hapdeng jongki, la ka long ha ka liang ka khaïi-pateng, ka jingbei tyngka, ki jingsdang kam thymmai, ka jingpynmih jingmut thymmai, haba iadei ruh bad ka juk stad saïan ba mynta bad ka teknoloji bad ka kam shna kali. La ong ruh ba kine baroh ki jingiatrei lang kin long ka jingkyntiew ïa ka jinglong-jingman bad ka ioh-ka kot ha baroh arliang ri.
Ki la pynpaw ruh ia ka jingroi jong ka jing-iatreilang ha ka khaii pateng bad ka jingbei tyngka hapdeng kine ki ar tylli ki ri ha kine ki snem ba la dep bad ba kin nang iai bteng ban pynskhem ia ka jing-iadei nangne shakhmat.
Kumjuh, na ka liang jong katei ka President- Sheinbaum, ka la iaroh ia ka jingkiew jong ka India ha ka liang ka teknoloji, ka jingpynmih thymmai bad ki jingtei paidbah digital bad ka la pynpaw ruh ia ka jing-angnud ban iatreilang bad ka India ha kine ki bynta.
Bad kumta ruh u Myntri Rangbahduh ka ri India u la pynpaw ba ki ar tylli ki ri ki dei ban wad ïa ka jingïatreilang ha ki bynta jong ki semiconductors, AI, Quantum bad ki marpoh khyndew ba kongsan.
