Shillong, Jylliew 18
U President ka United Democratic Party (UDP), Bah Metbah Lyngdoh u la ong ba ka Ïingdorbar Thawaiñ ka Jylla ka la shim da ka rai lyngba ka jingskhem jingmut (resolution) jong baroh 60 ngut ki MLA bad kaba la phah ruh sha ka Sorkar Pdeng haba ïadei bad ka jingdawa ban pyntreikam noh ïa ka Inner Line Permit (ILP) hapoh ka Jylla.
Haba kren sha ki lad pathai khubor ha ka 18 tarik Jylliew 2025, u Bah Metbah u la ong ba na ka liang u Myntri Rangbah ka Jylla bad ka kynhun Myntri ruh ki don ïa kajuh ka jingangnud bad ka jingkwah bad ki la ïai buddien ruh halor kane ka mat na ka por sha ka por.
Halor ka jingpynslem ban pyntreikam ïa ka ILP, u Bah Metbah u la ong ba ka jingpyntreikam ïa ka MRSSA kan ïarap ban weng ïa ki jingeh kiba ïadei bad ka jingwan tuid ki briew nabar sha kane ka jylla.
“Ngam ïohi eiei kaba bakla ha ka MRSSA. Ngi lah ban ïoh ïa kajuh ban peit ba kino-kino ki rukom treikam bad ki rukom pynïaid haba ïadei bad ka jingwanrung kyrthep ki briew kiba nabar ka Jylla,” ong u Bah Metbah.
Haba kylli halor ka jingpynslem ban pyntreikam ïa ka ILP hapoh ka Jylla bad ban ïoh ïa ka jingmynjur na ka Sorkar Pdeng, u Bah Metbah u la ong ba ka Sorkar Jylla ka hap ban buddien biang ïa kane ka kam na ka por sha ka por bad ong ba lehse, ka Sorkar Pdeng ka lah ban ïohi ïa ki katto katne ki bynta kiba don jingeh kaba wan ïatyngkhuh bad ki aiñ ka Sorkar Pdeng ban pyntreikam ïa ka ILP da kaba bynrap ba lada don kino-kino ki jingwit, ka donkam ban pynbeit biang.
“Kumta kata ka bynta ka hap ban pynbeit lada jia ba ka don bad kaei kaei kaba khanglad ïa ka Sorkar ban ïaid shakhmat bad ka nga thikna ba dei ban don katto katne ki mat ne ki jingkhanglad kiba dei shi bynta jong kata ka jingtreikam kaba ka Sorkar Pdeng ka pyrshang ban peit bniah,” ong u Bah Metbah.
