Khliehriat, Jylliew 18
Ban pynsuk ïa ki nongrep ka thaiñ khappud, ka MLA ka Sutnga-Saipung, ka Kong Santa Mary Shylla ha ka 17 tarik Jylliew ka la plie paidbah ïa ka jingkieng ïaid kjat (Suspension Footbridge) kaba la shna halor ka wah Amsngad ha ka shnong Ratacherra, East Jaiñtia Hills District.
Ïa kane ka jingkieng la bei pisa da ka Sorkar Jylla hapoh ka Inter-State Border Areas Development Programme (ISBADP) 2023-24.
Kane ka jingkieng ïaid kjat kan long ka jingïarap kaba khraw ïa ki briew kiba sah ha ki thaiñ khappud khamtam ïa ki nongshong shnong jong ka shnong Saitual.
Ka MLA Kong Santa Mary Shylla ha ka jingkren ka la ïaroh ïa ka jingtrei shitom jong ki nongshong shnong bad ka ophis jong u Border Areas Development Officer (BADO), Khliehriat na ka bynta ka jingïatreilang ha kaba pynthikna ba kane ka projek kan long kaba jop bad rah jingmyntoi ïa kiba shong ba sah haka thaiñ khappud.
Ka Kong Shylla ka la ong ruh ba kane ka jingkieng kan pynsuk ïa ki briew na Saitual sha ki shnong ba markhap kynthup ïa ka Ratacherrra, Umkiang bad kiwei kiwei.
U Waheh Shnong Ratacherra, Ma Pynkhlaiñ Dhar haba ai jingkren u la ïaroh ïa ka jingpyntreikam ïa kane ka projek da kaba u pynpaw ruh ba kham mynshwa, ki nongshong shnong na Saitual ki ïakynduh jingeh ban ïaid lyngba ïa kane ka jaka bad ki nongshong shnong na Ratacherra ruh ki ïakynduh jingeh ban jam sha shilliang ka wah na ka bynta ban leit rep leit riang hynrei da ka jingdon kane ka jingkieng ïaid kjat kan pynduh lut ïa kine ki jingeh.
