Khliehriat, Jylliew 18
Ka ïingbishar High Court of Meghalaya ka la bthah ïa ka National Highway Authority of India (NHAI) ba ka dei ban pyndep noh ïa ka jingmaramot bad pynthymmai ïa ka surok bah NH-06 ha shilynter jong ka East Jaiñtia Hills District hapoh ka 18 tarik Nailar (August) 2025.
Ïa kane ka hukum la pynmih da ka Division Bench kaba kynthup ïa u Chief Justice IP Mukerji bad u nongbishar W Diengdoh ha ka jingbishar ïa ka PIL No.11/2022 hapdeng ka Kynjaimon Amse (bam kwai ha dwar U Blei) pyrshah ïa ka National Highways Authority & ors.
Ka ïingkashari ka la ïohi ba katei ka PIL ka ïadei bad ka jingpynkhlaiñ bad pynbha ïa ka surok projek Jowai-Ratacherra jong ka National Highway-6 (NH-6) kaba jrong kumba 102.255 km. Ïa kane ka kam pynkhlaiñ bad pynbha la sdang naduh ka 22 tarik u Lber, 2024 da ka NHAI ha kaba ïa ka kam la aiti sha ar ngut ki kontraktor Purvanchal Buildtech Pvt. Limited ka jingtei ha kaba ïadei bad ka jingjngai kaba 51 km (Jowai sha Wahïajer) bad ka Dhar Construction Company ha kaba ïadei bad ka jingjngai kaba 51.255 km na Wahïajer sha Ratacherra.
Ka ïingkashari ka la ïohi ba ha ka jingbishar ba la dep, ka bynta ba nyngkong kaba 51 km, ka long 67 percent bad ha ka sector ba ar kaba 51.255 km, ka jingtrei la lah ban pyndep haduh 73 percent.
Ha kane ka jingbishar, u Shoumen Sengupta, Advocate ka NHAI ha ka kaiphod jong u, u la pyntip ba ha ka bynta kaba 51 km, la dep ban trei haduh 75 percent bad ha kawei pat ka bynta kaba 51.255 km, la dep ban trei haduh 80 percent.
U la ong ruh ba namar ka jingsniew ka suiñbneng, ka kam, kam shym la lah ban ïaid stet kumba la kular, kumta u la pan por biang ban ai ïa ka kaiphod.
Ka ïingkashari ka la ong, da kaba pyrkhat ïa ki jingai jingmut ba la ai bad ruh da kaba shimkhia ïa ka jinglong jong ka suiñbneng kaba mynta, ngi ai por ïa ka NHAI haduh ka 18 tarik u Nailar, 2025 ban ai ïa ka kaiphod.
La bthah ïa ka Amicus Curiae ban peit bniah bha ïa ka jingïaid shaphrang bad ban ai ïa ka kaiphod pyrshah, lada donkam, haduh kata ka tarik ba la kdew.
