Shillong, Jylliew 18
Ka jingïalehkai ba nyngkong jong ka Club World Cup ka la wanrah ka jingkylla ha ki lai tylli ki jingïakhun, ha kaba ka Inter Milan, kaba la ïalehkai nyngkong hadien ba ka la shah rem ha ka final jong ka Champions League, ka la ïakhaid mar 1-1 kol pyrshah ïa ka Monterrey ha ka Rose Bowl kaba ha California.
U rangïalehkai ba la rim u Sergio Ramos uba la ïalehkai nyngkong eh na ka bynta ka Monterrey, u la ïoh ban pynkhih jar nyngkong da kaba thep da ka khlieh na ka bynta katei ka kynhun kaba na Mexico ha ka minit kaba 25. Hynrei ka Inter ka la lah ban pynïakhaid kylla lyngba u Lautaro Martínez ha ka minit kaba 42.
Wat la u Martínez u la ïoh ïa ar tylli ki kabu ksiar, hynrei la kheiñ ba ka dei ka ‘offside’, katba u manager ba thymmai ka Inter, u Cristian Chivu u la pynïalehkai ïa katto-katne ki rangïalehkai kiba thymmai bad kiba ïapher na ka Champions League, ha kaba ka la shah rem haduh 5-0 kol ha ka PSG.
Ha ka Group-F, ka Mamelodi Sundowns jong ka South Africa ka la jop ïa ka Ulsan HD kaba na South Korea da 1-0 kol. Kane ka la wan urlong lyngba u Iqraam Rayners hadien ka jingïatrei lang bad u Lucas Ribeiro.
Ha kawei pat ka liang, ka River Plate ka la sdang ïa ka jingïalehkai jong ka Group-E ha kaba ka la jop da 3-1 kol pyrshah ïa ka Urawa Red Diamonds kaba na Japan.
U Facundo Colidio, Sebastian Driussi bad u Maximiliano Meza ki la ïoh ban thep kol na ka bynta katei ka klob na Argentina, katba u Yusuke Matsuo u la lah ban pynphai kylla shi kol lyngba ka penalty na ka bynta ka Diamonds.
