Baghmara, Jylliew 18
U Myntri Rangbah ka Jylla, Conrad K. Sangma ha ka Sngi Balang u la ïashim bynta ha ka sngi seng kaba 33 jong ka South Garo Hills District.
Ha kane ka jingïalang la wan ïashim bynta lang ruh da ki Myntri Sorkar – A.T. Mondal, Bah Shakliar Warjri, Marcuise Marak, bad u Rakkam A. Sangma, ha ryngkat ki MLA, u Sanjay Sangma, u Kartus Marak, u Sengchim Sangma, bad u CEM ka GHADC, u Albinus Marak.
Ha ka jingkren jong u, u Myntri Rangbah u la kren bniah halor ka jingangnud ka Sorkar ban kyntiew ïa ka South Garo Hills.
U la ïathuh ruh ha ka jingïalang ba naduh u snem 2018, la pyntreikam ïa ki projek bapher-bapher kiba shongdor T.1400 klur ha ka thaiñ, bad yn sa mang shuh sa T.400 klur hapoh ki skhim bapher-bapher ha kine ki 2-3 snem ban wan.
“Ha u snem 2018 ha ka por ba nga leit sha Baghmara, nga la kular ba ngan leh katba lah ban kyntiew ïa ka South Garo Hills. Ngi la buh thup ïa ki jingthmu bapher-bapher na bynta ka thaiñ bad ha kine ki 7 snem ba la dep, ngi la pyntreikam ïa ki projek bapher-bapher kiba shongdor T.1400 klur”, u la ong.
Haba pynpaw ba ka Sorkar ka la shimkhia na bynta ka roi ka par jong ka thaiñ, u la ong, “Ka South Garo Hills ka nang kylla dur suki-suki, da kaba thaw ki lad ki lynti na ka bynta ki nongshong shnong jong ngi.”
U la pyntip ruh ba katba ka Jylla ka dang pynkhreh ïa ka jingdap 60 snem jong ka, ka thong ka long ban pyntikna ïa ka roi ka par kaba kynthup lang ïa baroh.
“Ka la dei ka por ba baroh ki distrik kin saiñdur bad pynleit jingmut ïa ki sienjam bapher-bapher ban pyntikna ba ynda ka Meghalaya kan rakhe ïa ka jingdap 60 snem jong ka jingïoh Jylla lajong, kan don ka daw ïa uwei-pa-uwei na ngi ban rakhe bad sngew sarong kum u nong Meghalaya”, u la bynrap.
“Kaei ka ban long ka jingthmu kaba kongsan jong ka Baghmara – ban kyntiew, ki kam ïalehkai, ki jingtei ne ka khaïi-pateng- ngi hap ban pyrkhat bad saiñdur ïa ka,” u la ban jur.
“Lada ngi hap ban pynkylla dur ïa ka Meghalaya, tang ka Sorkar marwei kam lah ban leh ïa kane, uwei-pa-uwei u nongshong shnong u hap ban ïatreilang,” la ban jur u Myntri Rangbah.
Haba kren shaphang ka jingroi jong ki kam jngohkai pyrthei, u la ong, “Ka Sorkar ka don ban kyrshan ïa ka kam jngohkai pyrthei, nga sngewkmen ban tip ba ki briew ki mih shakhmat ban sdang ïa ka jingseng kam bad ki ‘Homestay’ ha Baghmara. Kane ka dei ka jingsdang jong ka jingkylla ha ka ïoh ka kot ka ban pyntikna ïa ka jingshngaiñ ka lawei jong ki nongshong shnong jong ngi,” u la ong.
U Myntri Rangbah u la ban jur ruh halor ka jingdonkam jong ki ‘Carbon Credit’ bad ka jinglah ban ïoh jingmyntoi jong ka South Garo Hills na kane ka sienjam.
U la kyrpad ïa ki nongshong shnong ba kin ïada ïa ki khlaw bad ki wah jong ki, da kaba kdew ïa ka jingriewspah jong ka thaiñ ha ka liang ki jingthaw ba don jingim bad ka jinglah ban khring ïa ki kompeni kiba wad ban siew kylliang na ka jingmih jong ki ‘Carbon’.
U Myntri Rangbah u la pyllait ruh ïa ka Meghalaya Economic Inclusive Programme (M-EIP) bad ka CM Fellowship, bad aiti ruh ïa ki ‘Cheque’ sha ki nongïoh jingmyntoi hapoh ka ‘MegCARE’.
Na ka liang jong u, u la buh ruh ïa u mawnongrim ban tei ïa ka jaka ïalehkai ‘Synthetic’ bad ka ïingmala bathymmai na bynta ka Captain Williamson Government Higher Secondary School.
Ha kane ka jingïalang la kynthup ruh ïa ka jingaiti ïa ki syrnot sha ki skul bad ki khynnah pule kiba la leh bha ha ki eksamin HSSLC bad SSLC.
Ha kane ka sngi, la ïoh ruh ïa ka jingkren na u Myntri ka tnat Pule-Puthi, u Rakkam A. Sangma bad u Myntri ka tnad ki kam ïalehkai, Bah Shakliar Warjri.
Shuh shuh ha kane ka jingleit jngoh jong u sha Baghmara, u Myntri Rangbah u la plie ruh ïa ka ‘Prime Hub’ ba dang shna thymmai bad leit jngoh ruh ïa ka Baghmara Police Station, kaba la pynthymmai hapoh jong ka Police Infrastructure Development Fund, ka jingthmu ba kongsan jong u Myntri Rangbah ka Jylla.
