Shillong, Jylliew 18
U Professor (Doctor) Kynpham Sing Nong-kynrih uba dei u khlieh jong ka Tnat English ha skulbah North Eastern Hill University bad kum u nongthoh kot Khasi bad Phareng, u la ïathuh ba ha ki por mynshwa ha ka jaidbynriew hynñiew-trep ka samla kynthei lada ka imon ïa uno-uno u shynrang ka ju ïathuh nyngkong ha ki kmie ki kpa.
Kane ka jingïathuh jong u Professor Kynpham haba ïadei ka rukom ïa pynbeit ban shongkha ka jaidbynriew hynñiewtrep ha ki por mynshwa ka dei hadien ka jingjia shah pynïap u Raja Raghuvanshi ha la ka jong ka kurim ka Sonam Raghuvanshi ha Weisawdong kaba hap ha ki thaiñ Sohra hadien ba la dep ïathoh shongkurim.
Kum ban shu pyn-kynmaw katkum ka jingbatai ki bahaïing ba ka jingïapoikha ka Sonam bad u Raja ka dei kaba la ïapynbeit da ki kmie ki kpa hynrei kine baroh ar ngut ki donlang ka jingïaieid.
Haba ka Sonam Raghuvanshi ryngkat ki lai ngut ki shynrang ki la shah kem ka mih sa kawei ka khubor ba ka jingshah kynnoh ban pynïap ïa u kurim lajong namar kam mon ïa u Raja hynrei ka mon ïa u Raj uba dei tang u nongtrei uba pynïaid ïa ki kam ki jam jong ka ïing ka sem jong ka.
Kumta ban tip shaphang ka jaidbynriew hynñiewtrep haba ïadei ka rukom shongkha, U Nongsaiñ Hima u la ïoh ban ïakren kyrpang bad u Professor Kynpham Sing Nongkynrih.
U Profesor Kynpham u la ïathuh ba ha ka jaidbynriew hynñiewtrep ki don ka jingngeit ïa ka riti jingieid haba ïa poikha. U la ïathuh ba mynshwa ki shynrang ki ju leit kai khynraw ha ka por janmiet ha ïing ba don ka kynthei samla bad lada ka kynthei ka la imon ka sa pyntip sha ki kmie ki kpa bad ka sa ïoh ban song kwai ïa u shynrang kaba imon.
Kumta, u la kyntu ïa ki samla ka jaidbynriew haba ki itynnad samla ki dei ban ïathuh shwa ïa ki kmie ki kpa khnang ban lait ka jingshah ieh khun rei bad ban skhem ka ïing ka sem.
