Shillong, Jylliew 18
Ka kynhun ïalehkai ka Jylla hapoh ka lama jong ka Muaythai Association of Meghalaya ka la khur haduh 50 tylli ki takma ha ka Umai National Muaythai Championship kaba la sdang naduh 9 haduh 14 tarik mynta u bnai ha MD University Rohtak kaba ha Haryana.
Kine ki kynthup ïa 23 tylli ki takma ksiar, 15 tylli ki takma rupa lem bad 12 tylli ki takma rnong ha la ki jong ki kyrdan ïalehkai kata naduh ka Sub-Juniors, Junior, Under-23 bad ka Elite.
Ka khubor kaba sngewtynnad hangne ka long ba ki khynnah kiba la khur ïa ka takma ksiar ha ka Sub-Junior, Juniors kin leit ban shim bynta sha ka “IFMA Youth Mauythai World Championship ka ban long ha Abu Dhabi, UAE naduh 10 haduh 21 tarik u Nailur 2025 bad kiba khur takma ksiar ha ka Under-23 bad Elite kin ïoh ban leit shim bynta ha ka “IFMA Seniors Men’s & Women’s World Muay-thai Championship 2025.
Katkum ka kyrwoh ba la pyllait da u President, Bah Anjelus Sun, u la pynpaw ruh ba kane long ka prokram jied nongïalehkai na ka bynta ban leit mihkhmat sha Asian Olympic Games. Ar ngut ki nongïalehkai na ka MTAM kata ka Alphonsa Zinia Wriang (16-17 snem), Andy Taro (16-17snem) ki la shah jied na ka Waikru ban leit mihkhmat na ka United Mauythai Association-India (UMAI) ka ban sa long ha Bahrain naduh 26 haduh 30 tarik u Risaw 2025.
Te kumta na ka liang ka Muaythai Association of Meghalaya ka la ai khublei khamtam ïa ki Referee & Judges bad ki Coach lem bad ki khynnah ïalehkai kiba la wanrah nam bad burom ïa ka Jylla baroh kawei. Ka jingai khublei kyrpang ka long ruh khamtam ïa ki kmie ki kpa kiba la shim khia ïa ki khun bad ka jinglut jingsep ban leit shim bynta sha ka Umai National Muaythai Championship. Katei ka synjuk ka la ai khublei kitbok kitrwiang ïa ki baroh ba kin dei ban nang trei shitom shuh shuh khnang ba kin lah ban wanrah ïa ka nam bad ka burom ha ki snem ban nang wan.
