Shillong, Jylliew 18
U Harshit Rana u la shah kynthup hapoh ka kynhun ïalehkai Test jong ka ri India na ka bynta ka jingïakhun pyrshah ïa ka England ka ban long ha ka 20 tarik mynta u bnai, la pynbna ka Board of Control for Cricket in India (BCCI) ha ka Sngi Balang.
U Rana u la don bynta ha ka kynhun ïalehkai jong ka India A bad mynta la pynïasoh ïa u bad ka kynhun ïalehkai ka ri ba la ïalam da u Shubman Gill na ka bynta ka jingïakhun nyngkong jong ka series ha Headingley.
U Rana, uba long u rangïalehkai ba don jingkyrmen, u la ïalehkai bha ha ka por ba ka India ka la leit sha Australia ha u Naiwieng 2024, ha kaba u la shim saw wiket ha ka jingïalehkai Test ba nyngkong eh jong u ha Perth kaba la noh synñiang sha ka jingjop kaba khraw jong ka India da 295 ron.
Une u rangïalehkai kriket, 23 snem ka rta, u la pyni ruh ïa ka sap jong u ha ka por ba u dang ïalehkai na ka bynta ka India A ha ka Test kaba nyngkong eh pyrshah ïa ka England Lions ha Canterbury, ha kaba u la ïoh ban shim wiket bad kaba pynshisha ïa ka jingtbit ha ka rukom tied, ha kaba u la lah ban khyrwit ar tylli ki ‘six’ pyrshah ïa ka England.
Nalor ki jingïalehkai Test, u Rana u la ïashim bynta ha ki san tylli One Day International (ODI) na ka bynta ka India, ha kaba u la ïoh ban shim 10 wiket ha ka average kaba long 20.70. U la pyni ruh ïa ka jingtbit ha ka jingïalehkai T20I pyrshah ïa ka England, ha kaba u la shim lai wiket. Mynta u snem, u la don bynta ha ka kynhun ïalehkai jong ka India kaba la jop ha ka ICC Champions Trophy.
Ka jingïalehkai kaba dangshen jong u Rana ka dei ha ka Indian Premier League (IPL) na ka Kolkata Knight Riders (KKR), ha kaba u la ïoh ban shim 15 wiket na 13 tylli ki jingïakhun.
Kumba ka long mynta ka India ka dang pynkhreh na ka bynta ka lympung ïalehkai jong ka ICC World Test Championship ka ban sa long shen, u Rana un ïasoh bad ki rangïalehkai kum u Jasprit Bumrah, Mohammed Siraj, Arshdeep Singh, Prasidh Krishna, bad Akash Deep, ha ryngkat ki all-rounder kata u Shardul Thakur bad u Nitish Kumar Reddy.
Hapoh ka jingïalam u kapten ba dang shu thung thymmai u Shubman Gill, ka India kan ïakhun pyrshah ïa ka England ha ka jingïalehkai Test series kaba la khmih lynti ban don san tylli ki jingïalehkai. Ka sien kaba khatduh ba kine ki ar tylli ki kynhun ki la ïalehkai Test san sien ka dei ha u snem 2024, ha kaba ka India ka la wanphai da ka jingjop kaba 4-1 ha ka la ïing.
Mynta kane ka kynhun ka la duh noh ïa ki nongtied ba kynsai u Rohit Sharma bad u Virat Kohli, kiba la shongthait baroh ar ngut na ki jingïalehkai Test.
Ki kyrteng ki rangïalehkai ki long Shubman Gill (c), Rishabh Pant (wk), Yashasvi Jaiswal, KL Rahul, Sai Sudharsan, Abhimanyu Easwaran, Karun Nair, Nitish Reddy, Ravindra Jadeja, Dhruv Jurel (wk), Washington Sundar, Shardul Thakur, Jasprit Bumrah, Mohammad Siraj, Prasidh Krishna, Akash Deep, Arshdeep Singh, Kuldeep Yadav bad Harshit Rana.
