Agartala, Jylliew:
Ki pulit jong ka Tripura ki la kem lajan 80 ngut ki briew ha ka por ba la don ka jingkhynra pyrshah ïa u drok ha West Tripura ha ka 17 tarik, Jylliew, ka jingpyntreikam ba la ïatreilang kaba thmu ban tehlakam ïa ka jingdih drok ha ka por ban rakhe ïa ka sngi pyrshah ïa ka jingdih drok bad ka jingkhaïi be-aiñ ha ka 26 tarik u, Jylliew.
Kane ka jingpynshitom beiñ ka la long ha ki jaka ba la tip kum ka Gulbazar, ka Heritage Park, bad ka Gwala Basti – hadien ka jingujor kaba man ka por na ki nongshong shnong halor ki jingïalang janmiet kiba ïadei bad ka jingdih drok. Ki kynhun na ki pulit jong ka Tripura, ka tnad pynïaid kali, ki thanat jong ka East bad West Agartala, bad ka ophis jong u Superintendent of Police ki la ïatreilang ban pyntreikam ïa kane ka jingkhynra.
Ki bor ba dei khmih ki la ïathuh ba kiba bun na kiba shah kem ki dei namar ka jingpyndonkam jong ki ïa u Ganja bad kiwei kiwei ki jingdih pynbuaid. Ïa kine baroh la pynkynriah mardor sha ki jaka pynbha hadien ba la kem.
Ka jingsngewkhia kaba khlem khmih lynti ka la mih ha ka por ba leh ïa ka jingpeit bniah – ka jingbun kiba shah set ki la shah Test ba ki don ïa ka jingpang HIV.
Ki heh ka tnat ka koit ka khiah kiba don ha katei ka jaka ki la pynthikna ïa ka jingpang bad ki la sdang ïa ka jingïatreilang ban sumar mardor.
Ki la don palat 15 tylli ki seng treimon sngewbha kiba treikam ha ka distrik kiba la shimkhia ban ai jingkyrshan, kynthup ïa ki dawai HIV bad ki jingai jingmut ha ka liang ka jingmut jingpyrkhat. “Ngi dang pyrshang katba lah ban ïarap ia ki ban wanphai biang sha ka jingim kaba bha bad kaba koit ba khiah bad ban ïasoh biang bad ka imlang-sahlang,” la ong uwei na ki nongpynïaid jong ka jingïalap paidbah.
U Dr Kiran Kumar K, IPS, Superintendent of Police, ka West Tripura, u la ban jur halor ka jinglong ryntih bad ka jingthmu kaba don ha lyndet jong kane ka jingthmu. “Kum shi bynta jong ka jingïakhih jong ngi ban pynduhjait ïa ka jingdih buaid, ngi don ïa ka projek ba kyrpang ha kaba ngi pynlong ïa ki jingïaid lynti saw sien shibnai, lane shisien man la ka 15 sngi,” u la ong ha ki nongthoh khubor.
“Mynta ka sngi, ha West Tripura distrik, ngi la kem kumba 70 haduh 80 ngut ki briew na ki jaka bapher bapher… Ngi la ïoh katto katne ki jingujor ba ki briew ki ïalum ha kine ki jaka ha ka por janmiet.”
U la bynrap ba ka jingïadon bynta jong ki seng bhalang ka long kaba donkam bha ban pynthikna ba ki briew kiba shah ktah kin ïoh ïa ka jingïarap kaba ki donkam.
“Ngi dang pyrshang katba lah ban pynthikna ba kine ki briew kin lah ban wanphai biang sha ka jinglong barim jong ki, kaba koit ba khiah bad ban im biang ïa ka jingim kaba thikna.”
Ki heh sorkar ki la ong ba ki jingtreikam kiba kum kine kin dang bteng kum shi bynta jong ka buit treikam jong ka jylla kaba kham heh ban ïakhun pyrshah ïa ka jingdih buaid, da kaba pynleit jingmut arsien halor ka jingpynjari aiñ bad ka jingïarap ha ka koit ka khiah.
