Shillong, Jylliew 18
U Bah Devid Kharsyntiew, President barim ka seng “Ki Khlur U Hynñiewtrep” ha ka 18 tarik u Jylliew 2025 u la mih shakhmat ban pynshai paidbah halor ka jingdon ki briew kiba dang khrong pisa beaiñ na ki dukan na ki ïew ki hat ha nongbah Shillong ban khrong pisa ha ka kyrteng jong ka seng da kaba ong ba kane ka seng ka la dep khylliap lama naduh u snem 2023 bad um shym la don bynta shuh bad kane ka seng.
Haba ïakren bad U Nongsaiñ Hima, u Bah Devid u la ïathuh ba ïa kane ka seng la seng ha u snem 2017 bad ki don kumba 1200 ngut ki dkhot hynrei mynta pat la dep ban khylliap lama noh.
U la pyntip sha ki paidbah ba lada ki lap biang ïa kita ki jait briew kiba wan khrong pisa beaiñ ha ka kyrteng ka seng “Ki Khlur U Hynñiewtrep” ki dei ban pynshitom beit lane kin aiti sha ki bor pulit namar ka seng kam don shuh bad ka la dep khylliap lama bad bynrap ruh ba um don jingbah-khlieh eiei halor kane ka kam.
Katkum ka jingïoh jingtip jong u ba ki don ki briew kiba khrong pisa beaiñ ha ka kyrteng ka seng “Ki Khlur U Hynñiewtrep” ka dei lyngba ka jingïathuh jong ki dkhot ka seng HYC kaba la pyntip sha u ba don ki briew kiba khrong pisa beaiñ ha ka kyrteng ka seng jong u.
Kumta u la ïathuh ba ïalade um don bynta shuh bad ka seng namar u la trei ki kam lajong bad lyngba kane ka jingkhrong pisa beaiñ ki briew ha ka kyrteng ka seng kan pynbudnam ïa ka kyrteng jong u namar u dei uba la seng nyngkong ïa kane ka seng bad ym tang kata kan pynbudnam ruh wat ïa ka ïing ka sem jong u baroh kawei.
U la ong ba ki briew kiba khrong pisa beaiñ ki lah ban dei hi ki dkhot barim jong ka seng bad lada dei sa mano-mano ruh kampher ki paidbah kin pynshitom beit lada ki wan khrong pisa biang na ki dukan jong ki.
U la bynrap ruh da kaba ong ba lada dei ki dkhot barim jong ka seng kiba leh ïa kane ka kam kin sa bahkhlieh hi lada jia kaei-kaei.
Namar kata, u la kyntu ïa ki paidbah ba kim dei shuh ban ai pisa kulmar nangne shakhmat sha ki briew kiba wan khrong pisa beaiñ.
