Shillong, Jylliew 18
Hapdeng ka jingjia shah pynïap jong u Raja Raghuvanshi bad ka jingjah rngai ka kurim jong u, ka Sonam Raghuvanshi bad hadien pat ba la lap noh ïa ka jingshisha ba la donkti da ka kuim jong u, kiba bun ki paidbah ka Jylla bad ka Ri baroh kawei ki la peit bad pule tang ïa ki khubor jong kine ki shijur.Hynrei kum kane ka jingjia kaba ïasyriem kala wan jia ha nongbah Shillong haka shnong Nongrah Nonglum Brei ha kaba kawei ka samla, la kynnoh ba ka la shah pynïap ha la u kurim ha ka ïingsah wai jong ki.
Kane ka samla kaba la ngat ha kane ka apot kaba sngewsih ka dei ïa kaba la tip kyrteng kum ka Priya Khongstia kaba don kumba 24 snem ka rta kaba dei naka shnong Umñiuh Tmar, katba u lok jong ka pat udei ba la tip kyrteng kum u Donald Sohtun uba don kumba 30 snem ka rta naka shnong Mylliem Mawpynthih.
Kane ka jingjia shah pynïap jong kane ka samla kala long ka jingjia kaba sngew shyrkhei bha ha kaba la kynnoh ba u kurim jong kane ka samla ula dkhat jubor ïa ka jingim jong katei ka samla da kaba ksih na ryndang bad tied ïa ka na khlieh haduh ba kan da mynsaw jur bad ba kan khlad noh na ka sla pyrthei. Ym tang katta, hynrei utei u kurim jong katei ka samla, ynda u la dep ban shim ïa ka jingim jong ka, la kynnoh ba ula sop ïa ka metïap haka ‘blanket’ bad ban buh haïing la kumba katto-katne sngi eiei.
Hadien ba utei u briew u la dep ban leh ïa kane ka kam runar, ula phet bak na katei ka ïingsah wai jong u kaba don ha Nongrah Nonglum Brei.
Naka liang U Nongsaiñ Hima haba ïoh ban ïakren bad ka Kong Iawanlang Khongstia kaba dei ka Meideng jong ka samla Priya Khongstia na Umniuh Tmar kaba la ri bad sumar ïa ka Priya naduh ba ka dang rit, ka la ong ba ka Priya kala ïashong-ïasah lang ryngkat bad u Donald Sohtun la kumba 3-4 bnai eiei ha kawei ka ïingwai kaba don ha Nongrah Nonglum Brei.
Ka Meideng jong katei ka samla kala ïathuh ba ka jinglap ïa ka metïap jong ka Priya ka dei hadien ba ki trai ïing ki la leit sha katei ka ïingsah wai bad ban lap ïa ka metïap kaba la kyllaiñ da ka ‘blanket’ ha madan haka 30 tarik u bnai Jymmang 2024 bad kila pyntip noh sha ki bor pulit.
Ka la ïathuh ba ka la ïoh ban phone khatduh ïa ka Priya ha ka 25 tarik u Jymmang bad naduh katei ka sngi ka khlem phone shuh sha ïingbad ong ba lehse, ula pynïap ïa ka hapdeng ka 25 tarik haduh ka 28 tarik u Jymmang.
Haba kylli halor ka jingshim jong u Donald Sohtun ïa ka jingim jong ka Priya, ka Meideng jong ka Priya ka la ïathuh ba ula phla ha ki pulit ba ula don ka jingtharai sniew ïa ka, kaba pynlong ba un shim noh shisyndon ïa ka jingim jong ka.
Shuh-shuh, naka liang ka Meideng jong katei ka samla kala kyrpad ïa ki bor ba dei khmih jong ka aiñ ba kin ym pyllait satia ïa utei u briew na patok bad ban ai ïa ka jingbishar kaba hok. Halor kane ka jingjia, naka liang ki bahaïing jong kane ka samla kila ujor noh da ka ejahar haka 30 tarik u Jymmang bad naka liang ki bor pulit ka thanat Rynjah kila ïoh ban kem noh ïa utei u briew ha katei kajuh ka sngi naka ïingsah jong ka kmie jong u kaba don ha Mylliem Mawpynthih.
Wat hapdeng ka jingduna haka ïoh-ka kot bad ka jingnang-jingstad naka liang ka ïing-ka sem jong ka samla Priya hynrei kaei kaba sngewtynnad ka long ba ki dang don pat ki briew kiba don ïa ka mynsiem ban ïarap ïa kane ka longïing ha kum kine ki jingjia ban ïoh ïa ka jingbishar kaba hok ha kaba naka liang ka Kong Rikyntimon Sahkhar bad u Bah Everstar Marbaniang kiba dei shikurim bad kiba shong-ba sah ha Umpling Dong Shaneng Block-1, ki la don bynta shikat dei eh ban ïarap ïaka longïing jong ka Priya ha baroh ki liang.
Ka Kong Rikyntimon Sahkhar bad u Bah Everstar Marbaniang ki dei kiba ju pyntrei ïa ka kmie jong ka Priya bad ka Meideng jong ka Priya haka ïingsah jong ki naduh mynshwa bad kila long kum ki kmie-ki kpa ba-ar jong ka longïing ka Priya kiba la ju ïarap bad khmih ïa ki jingdonkam ka ïing-ka sem jong ka Priya.
Naka liang ka Kong Rikyntimon Sahkhar kala ong ba ka kwah ba ka ïing-ka sem jong ka Priya kin ïoh ïa ka jingbishar kaba hok khnang ba kiwei ki para kynthei kin ym mad shuh ïa kum kine ki jingjia bad ban pynshitom ïa u Donald Sohtun katkum ki kyndon jong ka aiñ.
“Nga kwah ba kin ïoh ïaka jingbishar kaba hok khnang ba kiwei-kiwei ki para kynthei kin ym mad ïa kane ka jingshah lehbeiñ bad ba ka Sorkar kan peit bad tehlakam ïa kum kine ki jingjia. Ngi ki kynthei ngi dei ban don ïa ki lad jingïada bad ki aiñ kiba khlaiñ,” ong ka Kong Rikyntimon.
“Nga te nga ong ba u lah nud ban shim kat ïa ka jingim, u dei ban ïoh ïa kata ka jingpynshitom katkum ka aiñ,” bynrap ka Kong Rikyntimon.
