Shillong, Jylliew 18
Ka ‘Forever Young’ ka la kyrpad ïa u Myntri Rangbah ka Jylla, Conrad K. Sangma ban kynthup lang ïa ka ‘Theatre/ Drama’ kum shi bynta jong ka Meghalaya Film Tourism Policy, 2025.
“Ngi sngewnguh shi kat dei ïa ka jingkhot jong ka Sorkar Jylla ban pan jingmut na ki paidbah “ban pyntikna ïa ka jingïashim bynta kaba ïar ha ka ban pynwandur ïa ka ‘Meghalaya Film Tourism Policy 2025′” khnang ban ïoh pyndonkam ïa ka sap riewspah kaba don ha ka Jylla jong ngi ym tang ha ka liang ka rwai ka siaw, ka put ka tem, hynrei ruh ha ka ban “pynkhlaiñ ïa ka basa jingim jong ki phlim napoh ka Jylla kumjuh ban kyntiew ïa ka sap bad ban buh ïa ka Jylla kum ka jaka pdeng na bynta ka jingpynmih phlim ha ka Thaiñ Shatei Lam Mihngi” da kaba tyrwa ïa ka jingïarap pisa lem bad kiwei-kiwei ki jingkyrshan,” ong u President ka ‘Forever Young’, Bah Michael N. Syiem ha ka shithi ba la phah sha u Myntri Rangbah.
Ha kawei ka liang u la pynpaw ïa ka jingsngewsih ba haduh mynta, ïa ka sap ban ak bad ban pyni lyngba ka ‘Theatre’ ym shym la ai ïa ka jingphai khmat kaba ka dei hok ban ïoh.
“Ngi kwah ban wanrah ha ka jingpyntip jong phi ba ki don bun bah ki sap ki phong ha ka liang ka ‘Performing Arts’ lyngba ka ‘Drama’ hapdeng ki khynnah skul – kaba long lehnohei shisien ba ki la ‘pass’ na la ki skul namar ka jingbym don jong ki shlem ai jinghikai ban pynroi bad kyntiew ïa kine ki ‘riew donsap bad kawei na ki daw ka long ka jingbym biang ka jingkyrshan na ka Sorkar,” u la ong.
Haba pynshai halor kane ka bynta, u Bah Syiem u la ong ba ka ‘Theatre’ kam dei ka kam khaïi, kumba ka long ïa mynta hapoh ka Jylla, hynrei ka dei ruh u mawjam ban rung sha ki kam khaïi kum ki phlim/ka jingpynmih phlim bad ki jingpynbna kam khaïi ha ka Jylla bad kumjuh ha ka ri bad wat ha ka kyrdan jong ka pyrthei.
Haba kdew ba ka ‘FOREVER YOUNG’ ha ryngkat bad ka ‘MAITSHAPHRANG’ ki la ju pynlong katto-katne tylli ki jingïalehkai ‘Street’ bad ‘Stage Play’ ha ki por ba la leit ha ka ktien Khasi bad Phareng, u President u la ong, “Ngi la shim bynta ruh ha ar tylli ki kam ak drama ha Doordarshan Kendra, Shillong’ bad kawei pat ban kyntiew halor ka jingnang-jingstad na bynta ka NEHU. Kiba la buh ha ‘YouTube’ ki long “Papa Shano Phi Don” bad “Burom Ïa Uba Ïap”, baroh ar ki dei ki sur jingrwai ha ka ktien Khasi bad ka ‘Musical Play’ ba dang shen ha ka Phareng – “Juliet and Romeo”.”
Hynrei namar ka jingbym biang ka jingïarap pisa na ka Sorkar ngim lah ban pyni rynsan ïa ki drama jong ngi katkum ki kyrdan kiba donkam, u la ong.
Shuh shuh u la bynrap, “Kumta ngi kyrpad ïa ka Sorkar jong phi ba kan kynthup lang ha ka ban kyntiew ïa ka kam ‘Theatre’ kum shi bynta jong kane ka mat treikam, da kaba ai ïa kijuh ki jingkyrshan pisa bad ngi pyntikna sha phi ïa ka jingkular jong ngi ban ïatreilang ha kaba pynbiang ïa ka rynsan kaba khlaiñ – ban rah ïa ka kam ‘Theatre’ sha kawei pat ka kyrdan jong ka jingtbit kumba long ha Assam bad Manipur.”
