Shillong, Jylliew 18
Ka District Magistrate, East Khasi Hills ka la pynjari ïa ka Kyndon 163 BNSS kaba mana ïa ka jingpynhap khyndew, marjot, jingbret ïa ki ñiut ha shilynter ka surok bah naduh Lad Rilbong shaduh Upper Shillong bad ka National Highway jong ka Shillong-Guwahati.
La pynjari ïa kane ka kyndon hadien ba la ïohpdiang ïa ki jingujor ba ka la don ka jingpynhap beaiñ ïa u khyndew bad marjot bad ki ñiut ha Umshyrpi (Lad Rilbong) shaduh Upper Shillong bad surok Guwahati hapoh East Khasi Hills. Kum kine ki kam beaiñ, lada ailad, ki lah ban ktah ïa ka koit ka khiah bad pynthut ruh ïa ka jingtreikam jong ka NHIDCL.
Kiba pynkheiñ ïa kane ka hukum kin ngat ha ka jingpynshitom hapoh ka kyndon 223 jong ka BNS. Kane ka hukum kan treikam mardor tad haduh ban pynbna da kumwei pat.
