Shillong, Jylliew 18
Ha kaba ïadei bad ka jingjia shah pynïap jong u Raja Raghuvanshi, u hynmen jong ka Sonam Raghuvanshi kaba la shah kynnoh donkti ha kane ka kam, u la pynpaw ba u kloi ban pdiang ban shah leh ‘narco test’ hadien ba ka la don ka jingdawa na ki bahaïing jong u Raja Raghuvanshi.
Lah ban kdew ba ha ka Sngi Nyngkong, u hynmen jong u Raja Raghuvanshi u la dawa ban leh ‘narco-analysis test’ ïa ka Sonam, ki bahaïing jong ka bad ong ruh ba ki suba ïa ka jingdonkti jong kiba bun ki briew ha kane ka kam pynïap.
Haba kren sha ki lad pathai khubor ha ka Sngi Balang, u Govind, hynmen jong ka Sonam Raghuvanshi, u la ong, “Ïa kiei kiei ki jingshisha baroh kiba don, nga la dep ban sam lut baroh bad ki lad pathai khubor bad ruh bad ki. Kumta wat hadien kata, lada ki dang don ka jingartatien, ki lah ban pynlong ka jingtohkit, ngi long kiba kloi ban wan shakhmat na ka bynta ka jingtohkit.”
Shuh shuh u la pynpaw ïa ka jinglong kloi ka jong u ban ïatreilang bad bynrap “Lada ki dawa ïa ka narco test, na ka liang ki bor ba dei khmih ki dei ban leh ïa kane ka tes.”
Ha kaba ïadei bad ka jingïakren bad ki pulit, u Govind u la ong, “Nga la ïoh jingtip ba ki pulit ka Meghalaya ki la wan hynnin ka sngi, bad ngam tip kaei pat ka ban jia. “Ki pulit ka Meghalaya ki la phah wan ïa nga sha Shillong ban ai ïa ka statement, hynrei kim pat shym la pynthikna. Nga la ong ïa ki, ba la don kano-kano kaba kyrkieh, ki dei ban pyntip ïa nga, khnang ba ngan ïoh wan mar-mar da ka liengsuiñ kaba nyngkong.”
