Shillong, Jylliew 18
Ka Khasi Students’ Union (KSU) Warmawsaw Unit ha ka janmiet jong ka 18 tarik mynta u bnai, ka la ïoh bat ïa ki bar Jylla kiba thmu wan trei bylla sha ki thaiñ Patharkhmah kiba wan lyngba ka surok Bakhlapara Warmawsaw sha Patharkhmah.
Ha ka jingtohkit ïa kitei ki bar jylla la lap ba uwei ruh um don ïa ki kot ki sla kiba biang kum ka ‘Labour license’ bad ‘Police verification’ na ka jaka ba ki wan. Kumta na ka liang ka seng ha ka jingïalam u samla Receive Pator President bad Assistant General Secretary u samla Roki Lyngdoh mar-mar ki la phah leit phai noh ïa kitei bar jylla sha jaka na kaba ki wan.
Ka seng ka maham jur ïa ki briew kiba donkti ban wan ïalam ïa ki bar jylla khlem da pynbiang ïa ki kot ki sla kiba biang bad lada ka lap kan leh da kaba tyngeh. La pynkut ka kyrwoh na u samla Receive Pator, President KSU Warmawsaw Unit.
