Shillong, Jylliew 18
Ha ka kyrwoh na u Bah S. Lyngdoh, Publicity Secretary jong ka Seng Ïeng Rasong Sports Social and Cultural Club, Shillong ba na ka liang ka seng ha ka jingïatreilang bad ka Yes Meghalaya ki la pynlong ïa ka jingpynshai halor ka jingdih drok bad kaba ma ha ka imlang ka sahlang ha ka 13 tarik u Jylliew 2025 ha Ïew Thymmai Mawryngkneng, East Khasi Hills District ha ka por 1 baje nohphai sngi.
Ha katei ka sngi ïa ka prokram la pynïaid da u Bah Kes Nongpluh Rangbah Dong Nongmadan Mawryngkneng bad u la ai ruh ïa ka jingkren plie ïa ka prokram.
La ïoh ka jingkren ruh na u Dr. David Lyngdoh, nongïalam jong ka seng ha kaba u la ong ba kane ka dei ka thma jar-jar bad ka thma ba jar-jar shaphang u drok bad ka pyntroiñ ïa ka pyrkhat pyrdaiñ ïa ki khun samla ki jong ngi. La pynbud ïa kane prokram da ka jingïaleh sawangka shaphang u drok da ki khynnah skul jong ka Mawryngkneng RMSA Secondary School.
Haba kren ha katei ka sngi na ka liang u Bah H.S. Kharpran, MLA ka Mawryngkneng konstitwensi ha kajuh ka por uba long ruh kum kongsan u la ong ba u drok u long kum ‘seiñpuh bad nongshun jong ka jaitbynriew.
U la ong ruh ba ki khun samla ki dei ban kiar shi syndon na une u jait jingdih (drok) uba pyntroiñ ïa ka jaitbynriew. Na ka liang u Bah Shemphang Marbañiang, Resources Person na Social Welfare Department, u la ong ba ka jingkheiñ khanasamari na ka liang ka sorkar bad ka Social Welfare Department ba u snem 2023 kiba la ngop ha u drok ki don haduh 2,50,000 bad tang ki kynthei ki don kumba 30,000 ngut.
U Bah Samuel Lamthom 2nd officer Incharge Mawryngkneng Police Station, u la banjur ïa ki khun samla ba dei ban kiar na une u jingdih (drok) ba pynbuaid. U la bynrap da kaba ong ba na ka liang jong u, u la trei shitom ban kem shibun ki nongdih drok bad nongdie drok sha kine ki thaiñ Mawryngkneng.
La ïoh ruh ka jingkren na u Bah Meban Tariang, Councellor KRIPPA Foundation Nongsder ha kaba u la ai jingmut ïa ki khun samla shynrang bad kynthei ba ki dei ban kiar shisyndon na kine ki jingdih basniew kum u drok bad kiwei kiwei ruh ki jingdih basniew.
Haba pynkut ïa kane ka prokram na ka liang ka Kong L. Lyngdoh Khongsngi, Working Vice President jong ka seng ka la ïa khublei kyllum lang ïa baroh kiba la wan ïashimbynta ha kane ka prokram ban pynshai halor u drok.
