Ha ka 19 tarik Nohprah 2019, ka Ïingdorbar Thawaiñ ka Meghalaya ka la pynmih da kawei ka sur ïa ka rai ban kyntu ïa ka Sorkar India ba kan pyntreikam ïa ka Inner Line Permit (ILP). Ngi dang kynmaw kyndiang ïa kato ka sngi ha kaba baroh ki MLA ki la ïa mynjur halor katei. Kane ka jingmynjur ka long hadien ba ka Parliament ka la ai ïa ka jingkohnguh ban pynlong aiñ ïa ka Citizenship (Amendment) Bill, 2016. Hadien ba ka Ïingdorbar Thawaiñ ka la ai jingmynjur, na ka liang ka Sorkar India ka khlem pat jubab eiei da kaba shai. Kane ka rai jong 60 ngut ki MLA ka Meghalaya ban dawa pyntreikam ïa ka ILP ka la shu sahkut ha suiñ wat haduh mynta-mynne. Ngim tip aïu ka Sorkar India ka la rai halor kane hynrei ka la shu pynkyllaiñ ïa ka jubab kaba long tang ka jingpynsyrwa kai ïa ka por jong ka dorbar bad ki paidbah.
Mynta ka kynti ka jingdawa ILP ka la mih sawa biang. Kane ka dei hadien ka jingjia shah pynïap jong u Raja Raghuvanshi, uba dei u nongjngohkai pyrthei na Indore, Madhya Pradesh ha Sohra. Halor ka jingshah pynïap u Raja, ki pulit ki la dep ban kem noh ïa ki san ngut ba kynthup ruh ïa ka kurim jong u ka Sonam Raghuvanshi halor ka jingkynnoh bad suba donkti halor kane ka kam. Kane ka jingjia ka la pynkhih win ym tang ïa ka Meghalaya hynrei ïa ka Ri hi baroh kawei. Ki sengbhalang kiba bun bad kumjuh lada peit ha ki jingkynthoh ha ki channel bapher-bapher halor katei ka jingjia, kiba bun ki la pynpaw ba lada dei ba treikam ka ILP hapoh Meghalaya, kum kane ka jingjia, kan ym jia ne la lah ban ïada. Ka sur kaba jam ka la sawa biang na ki sengbhalang ba dei ban pyntreikam noh ïa ka ILP ba kan long ka lad jingïada ïa ki briew kiba wan nabar jylla.
Halor kane ka jingsawa biang ka sur dawa ILP, wat na ka liang jong ka Sorkar Jylla ruh ka la pynpaw ba kan leit ban buddien biang na ka Sorkar Pdeng bad ha kajuh ka por ka la pynpaw ruh ïa ka jingdonkam ban pynkhlaiñ noh ïa ka aiñ MRSSA. Ngim tip la ka Sorkar India kan kloi ne em ban ai ïa ka ILP, kaba sah ka shong sa ha ka Sorkar Jylla.
Ngi pynkynmaw ba ka Sorkar India lyngba ka tnat Korbar Ri ha ka 1 tarik Nohprah, 2021, kam shym la ong hooid ne em halor ka jingkylli la kan pyntreikam ïa ka Inner Line Permit (ILP) ha Meghalaya. Kane ka jingbym kren shai jong ka Sorkar India ka la paw ha ka Dorbar Tlang jong ka Rajya Sabha halor ki jingkylli ba la wanrah da u MP na Meghalaya, u Dr. W.R. Kharlukhi. Haba ka jubab kam shai, ka la dei ka bynta jong ka Sorkar Meghalaya ban leit sha Delhi bad ban ïakren biang bad ka Sorkar India halor ka jingdawa ILP. Ka jubab ba ka Sorkar Jylla ka dei ban ïoh kan hap long kaba shai kdar bad ym kaba kyllaiñ kumba kyllaiñ ki surok ha Meghalaya khnang ba ka Sorkar bad ki paidbah kin sngewthuh ïa kaei pat kaba hap ban leh nangne shakhmat. Ka long biej shaba palat haba kat ïa ka rai jong ka Ïingdorbar Thawaiñ, kaba dei ka sur jong ki nongshong shnong, la shu buh sharud da ka Sorkar India mynta la ïaid bun tylli ki snem.
Ngi ïohi ba wat ka Sorkar Meghalaya ka la leh klet halor ka mat. Ngim ïohsngew shuh na ka liang u Myntri Rangbah ba un leit sha Delhi ban ïakren bad u Myntri Korbar Ri ban pynthikna la ka Sorkar India kan ai ne em ïa katei ka jingdawa ILP jong ka Meghalaya. Tangba kum ki nongshong shnong, ngi don ïa ka hok ban tip da kaba shai na ka Sorkar India la kan kohnguh ne kyrngah ïa katei ka jingdawa. Ban shu sngap mynthi pat ka long biej kat ïa ka Sorkar India.
