Shillong, Jylliew 18
Ki kam tuh kam thiem ki la nang bteng na kawei ka sngi sha kawei pat. Kane ka jia ym tang na ki ïing ne ki dukan hynrei wat ki ïingmane ruh kim shngaiñ shuh.
Katkum ka khubor ba la ïoh na ki pulit la ong ba la ïoh ka jingujor ba ha ka janmiet jong ka 16 tarik mynta u bnai, uwei u runar bym lah ban ithuh u la tuh ïa kawei ka ‘portable speaker’ napoh ka ïingmane Presbyterian kaba don ha 4 Mer Shiteng, Upper Shillong.
La ong ba ïa kane ka jingjia baroh, la ïoh ban ring dur na ka kor CCTV kaba la pyndait ha kane ka ïingmane. Halor kane, ki pulit mynta ki dang pynlong ka jingtohkit ban lap dien ïa utei u runar uba la donkti ban tuh.
Ha kawei pat ka jingjia, ka Nabita Upadhya ka la ujor da ka ktien ba ha ka 16 tarik mynta u bnai, ki runar bym lah ban ithuh ki la tuh ïa ka bicycle jong u khun jong ka, kaba shongdor kumba T.10,000/- na ka jaka sah jong ki, kaba don ha Upper Mawprem, Shillong.
Ha kawei pat ka khubor, u Satyam Yadav u la ai ka jingujor sha ki pulit ba ha ka 16 tarik mynta u bnai, ki runar bym lah ban ithuh ki la tuh ïa ki waïar, kiba la pyndait na ka bynta ka Smart City Project kaba don ha VMD Red Cross, Shillong.
Ha kawei pat ka khubor, ka Manju Roy, ha ka 13 tarik mynta u bnai, ka la leit mih hakhmat jong ki pulit ka Dobasipara OP ha West Garo Hills bad ban ai ka jingujor da ka ktien ba ki runar bym lah ban ithuh ki la prong tuh hapoh ka ïing jong ka, bad ban tuh ïa ka pisa kaba long T.52,000/- bad ka ksiar kaba shongdor kumba T.1 lak.
