Mairang, Jylliew 18
Ka Little Star Higher Secondary School ka la ïoh ban rah ïa ka nam lahduh ha baroh lai tylli ki kyrdan ïalehkai jong ka Eastern West Khasi Hills District Level Inter School Subroto Mukherjee Cup Football Tournament 2025.
Ïa kane ka lympung la pynïaid da ka shlem treikam jong ka District Sports Officer (DSO) West Khasi Hills ha ryngkat ka jingïatreilang bad ka District Sports Association, Mairang.
Ha ka jingïalehkai final jong ka Under-15 ki shynrang kaba la long ha ka Sngi Balang ha madan Dom Mawlum Pyndengumïong kaba ha Mairang, ka Little Star ka la lah ban pynliem noh ïa ka Nongrim Seng Khasi Secondary School da 4-0 kol.
Kumjuh, ha ka final jong ka Under-17 ki kynthei, ka Little Star ka la jop da 1-0 kol ïa ka St. Thomas Higher Secondary School Sohmylleng, katba ha ka Under-17 ki shynrang katei ka skul ka la lah ban pynliem noh ïa ka Mawkhar Presbyte-rian Secondary School da 1-0 kol.
Ha katei ka sngi, ïa ka nam Best Player ha ka Under-15 la ïoh da u Mebanshan Diengdoh na ka Little Star, Top Scorer ka leit sha u Leroy Gadial Lyngdoh Mawnai na ka Mairang Presbyterian Higher Secon -dary School bad Best Goalkeeper la ïohpdiang da u Khlurshynshar Marthong na ka Little Star HSS.
Nangta ha ka Under-17 ki shynrang, ïa ka nam Best Player la ïohpdiang da u Mebalajied Warjri na ka Little Star, Top Scorer ka leit sha u Krebinson Marweiñ na ka Little Star bad ïa ka nam Best Goalkeeper la ïohpdiang da u Paskal Rani na ka Little Star HSS.
Shuh shuh ha ka Under-17 ki kynthei, ïa ka nam Best Player la ïohpdiang da ka Venecle Kharma-sulman na ka Little Star, Top Scorer ka leit sha ka Wandari Rani na ka Little Star bad ïa ka nam Best Goalkeeper la ïohpdiang da ka Barisha Marweiñ na ka Little Star.
Ïa ki khusnam sha kitei kynhun la sam da u MDC ka Parïong Mawthadraishan Constituency, Bah Powell Sohkhlet kum kongsan ha ryngkat ka jingïadon lang u ADC ka EWKHD, Bah A. Nongbri, ka DSO WKH bad In charge Eastern West Khasi Hills ka Bong Balarina Syiem, u President ka District Sports Association, Bah Lambok Nongrang lem bad kiwei kiba la shah khot sngewbha.
