Shillong, Jylliew 18
Ka lympung ïalehkai jong ka English Premier League 2025-2026 kan sdang ha ka 15 tarik u Nailar ha kaba ka lahduh jong ka aïom ba la dep, ka Liverpool kan sdang ïa ka jingïakhun kaba nyngkong ha la ïing pyrshah ïa ka Bournemouth, katba ka Manchester United pyrshah ïa ka Arsenal ha ka 17 tarik.
Ïa kane ka prokram ïalehkai Premier League jong ka aïom ban wan la pynbna ha ka Sngi Balang khnang ban ailad ïa ki kynhun ïalehkai bad ruh ïa ki paidbah nongkyrshan ba kin long kiba la pynkhreh lypa hadien ba ka aïom ba la dep ka la poi sha kaba kut.
Ka Manchester City, kaba la khmih lynti ban rah ïa ka nam lahduh na ka bynta ka sien kaba hynñiew ha ka Premier League hapoh ka jingïalam u Pep Guardiola, kan leit sha Wolverhampton Wanderers na ka bynta ka jingïalehkai kaba nyngkong ka ban long ha ka 16 tarik u Nailar.
Ka dei ka jingsdang kaba eh bha na ka bynta katei ka kynhun jong u Arne Slot ha kaba kan leit sha Newcastle ha ka taïew ba ar, bud sa ka jingïakhun ha la ïing pyrshah ïa ka Arsenal, kaba long kawei pat ka kynhun jong ka Champions League ka ban long hadien shi taïew.
Ka Arsenal kaba la wan ba-ar lai sien lynter jong ka aïom ïalehkai, kan ïakhun pyrshah ïa ka Manchester United, Liverpool, Manchester City bad Newcastle ha ki hynriew tylli jingïalehkai ba nyngkong jong ka.
Ka Everton kan pynkhreh ïa ka jingïalehkai ha la ïing hapoh ka stadium kaba lah ban ngiam haduh 53 hajar ngut ki paidbah ha Bramley-Moore Dock pyrshah ïa ka Brighton ha ka 23 tarik u Nailar.
Ka jingïalehkai ba nyngkong eh jong u Thomas Frank ha ka Premier League ha kaba un pynïaid ïa ka Tottenham ha la ïing pyrshah ïa ka Burnley ha ka 16 tarik. Kane ka la wan hadien lai sngi ba u Frank u la ïakhun nyngkong bad ka Tottenham kaba dei ka nongjop jong ka Europa League pyrshah ïa ka Paris Saint-Germain kaba long ka lahduh ha ka Champions League, ha ka UEFA Super Cup.
Ka jingïalehkai ba nyngkong eh jong ka Sunderland ha ka Premier League naduh ka samoi ïalehkai 2016-2017 ka long ha la ïing pyrshah ïa ka West Ham, katba ka Leeds kan pdiang nyngkong ïa ka Everton hadien ba ka la wanphai biang sha ka kyrdan ba hakhlieh duh hadien ba ka la sahkut ar snem ha ka Championship.
