Shillong, Jylliew 19
Ka ïingbishar jong u District & Sessions Judge Shillong ha ka Sngi Palei ka la ai bor ïa ki pulit ka East Khasi Hills District ban tohkit biang sa ar sngi ïa ka Sonam Raghuvanshi bad u samla jong ka u Raj Kushwaha katba ïa ki lai ngut kiwei pat la phah sha along lane judicial custody na ka bynta 14 sngi ha kaba ïadei bad ka jingshah kynnoh pynïap jong u Raja Raghuvanshi ha ka 23 tarik Jymmang ha Weisawdong.
Kane ka jingtohkit sa ar sngi da ki pulit ïa ka Sonam bad u Raj ka long hadien ba la kut not ka 8 sngi ba ka ïingbishar ka la ai bor mynshem taïew, katba ïa ki 3 ngut kiwei pat, ka ïingbishar ka la phah noh sha judicial custody na ka bynta 14 sngi.
Haba ïakren bad u nongïasaid aiñ, u Tushar Chanda u la ïathuh ba ïa ka Sonam bad u Raj ka ïingbishar ka la shah ïa ki pulit ban tohkit biang sa ar sngi katba ïa ki lai ngut la phah sha along haduh 14 sngi.
Une u nongïasaid aiñ u khlem kren eiei shuh haba ki nongthoh khubor ki la bynrap biang ki jingkylli namar um kwah ban batai eiei haba dang ïaid ka jingtohkit.
Ha shwa ba ki pulit ka East Khasi Hills district kin ïalam sha ïingbishar ha ka por janmiet, ki la ïoh ban ïalam biang ïa ka Sonam Raghuvanshi lem bad 4 ngut ki shynrang sha Civil Hospital Shillong na ka bynta ban phah peit bniah ïa ka jingkoit jingkhiah ka jong ki.
Nalor ka Sonam, kine saw ngut ki shynrang ki long u Raj Kushwaha, u Vishal Singh Chauhan, u Akash Rajput bad u Anand Kurmi. Ki pulit ki la sei na thanat Sadar ïa kine ha ka por 3:00 baje janmiet ban ïalam sha Civil Hospital Shillong ban phah peitbniah bad mar shu dep ki la wanphai biang sha thanat Sadar.
Ha kane ka por, ki pulit ki la tap ïa ka durkhmat jong kine ki san ngut haba ki mih bad rung khnang ban ym pyni dur sha ki paidbah kiba dang ïeng laiñ ban shim dawai ha katei ka jaka sumar.
Ha ka por 6:30 janmiet ki pulit ki la leit rah biang ïa ka Sonam Raghuvanshi lem bad ki 4 ngut sha ïingbishar ka dei hadien ba ki la dep ban tohkit 8 sngi lynter ba ka ïingbishar ka la ai bor ban tohkit halor ka jingshah kynnoh pynïap ïa u Raja Raghuvanshi.
Kum ban shu pynkynmaw, ki pulit myn ha ka Sngi Ba-ar ka 17 tarik u Jylliew ki la leit ïalam ïa ka Sonam Raghuvanshi bad ki 3 ngut sha Weisawdong, Sohra ban phah batai kumno ki la pynïap ïa u Raja Raghuvanshi bad ban bret ïa ka met shapoh riat.
