Shillong, Jylliew 19
Ka lympung ïalehkai 4th Division Under- 20 Football League 2025 ba la pynïaid da ka Shillong Sports Association (SSA) ka la nangjam shaphrang ha kaba ka Mawlynrei SC, Lumpyngngad SC bad ka Mawnianglah SC ki la ïoh jingjop ha ka Sngi Palei.
Ha kane ka jingïa-khun kaba la long ha SSA Stadium kaba ha First Ground Polo, ka Maw-lynrei SC ka la pynliem noh ïa ka Lawei SC da 5-2 kol. Kane ka la wan urlong lyngba ki kol ba la thep da u Kerry J Marboh ha ka minit kaba 7, kumjuh u Wanborrupa Rynjah (27), Elvinson Kharsohnoh (58), Ferdi-nand Pyngrope (73) bad ïa kawei pat la ïarap pynthep da u rangïalehkai ka Lawei u Dawanchwami Kharsyntiew (34). Na ka liang ka Lawei ka la pynphai kylla ar kol lyngba u Shemphang Synnah (15 & 76) ha shwa ba kan shah rem.
Ha kawei pat ka jing-ïakhun, ka Lumpyngngad SC ka la pynliem noh ïa ka Riatsamthiah SC lyngba ka shi kol ba la thep da u Ebenezer D Kharhari ha ka minit kaba 20.
Haba phai sha kawei pat ka jingïakhun kaba khatduh, ka Mawnianglah ka la pynjem khnap ïa ka Krang SC haduh 6-1 kol. Kane ka la wan urlong lyngba u Ericson Khar-kongor (3 & 19), Mel-vinson Marbaniang (40 & 56) bad u Stevenson Nongneng (65 & 76) kiba la thep mar ar kol. Katba u Jerkupar Dohtdong (44) u la lah ban pynphai kylla shi kol na ka bynta ka Krang ha shwa ba kan mad ïa ka jingshah rem.
Ha ka Sngi Thoh-dieng, ka Mawlyngngad SC kan ïakhun pyrshah ïa ka Nongkolew SC ha ka por 10:30 mynstep, kum-juh ka Golflink SC ïa ka Laitkroh SC (1:30 mynsngi) bad ka Risa Colony SC pyrshah ïa ka Thyn-roit SC (4:15 janmiet).
