Shillong, Jylliew 19
U Myntri Rangbah ka Jylla, Conrad K Sangma ha ka Sngi Palei u la buh ïa u mawnongrim ban tei ïa ka Additional Secretariat Complex ha Dakopgre, Tura.
Kane ka projek ïa kaba la mang pisa ?156 klur, ka dei ka jingmih na ka jingangnud kaba la slem bha jong ki paidbah ka rilum Garo.
Da kaba kdew ïa kane ka projek kum ka ‘historic’ na ka bynta ki paidbah ka jylla bad khamtam eh na ka bynta ka Garo Hills, u Conrad u la ong, “Ka dei ka sngi na ka bynta jong ngi iwei-pa-iwei ban kynmaw. Ngi dei ban sngewnguh ïa U Blei. Ka Additional Secretariat Complex kam dei tang ka jingtei hynrei ka dei ka testament ban pynurlong ïa ki jingangnud jong ki paidbah jong ngi”.
Haba kynthoh ba katei ka secretariat kan ai ka jingshakri kaba paka ïa ki paidbah ka rilum Garo, kiba la hap ban ïakynduh shibun ki jingeh ban ïoh ïa ki jingshakri bapher-bapher jong ka Sorkar. Kane ka Additional Secretariat kan shakri ïa ki paidbah jong baroh san tylli ki district jong ka rilum Garo.
“Ki paidbah mynta kin lah ban peit shakhmat ïa kiba bun ki jingshakri Sorkar ban ai bad pynbiang na Tura. Kumta, kane ka dei ka projek kaba kongsan bha na ka bynta ka jylla bad khamtam eh ïa ka rilum Garo bad ïa ki nongshong shnong jong ka,” u la bynrap.
U Conrad u la ïathuh ha kane ka jingïalang halor ka jingïaid shaphrang jong ka New Secretariat building kaba dang shna ha Shillong ha kaba ka jingmang pisa la antad ba kan kot sha ka T.1800 klur.
“Ngi la thaw ïa ki jingtei, da kaba buh ha ka jingmut ïa ki 100 snem ban wan. Ngi kwah ban pynthikna ba ka jingsynshar kam dei tang ba kan jan sha ki paidbah hynrei ba kan long kaba suk ban ïoh,” u la bynrap.
U la pyntip ruh ba da ka jingthmu ban pynthikna ïa ka roi ka par kaba ïaryngkat ha kylleng ka jylla, ka Sorkar ka la thmu ryntih ïa ki jingïarap na ka bynta ki district bad ki block.
“La ka long ki ophis block kiba thymmai, ki building sub division – kiba rim bad kiba thymmai, ki ophis district, ki jingtei jong ka koit ka khiah, ki jingtei jong ki pulit lane jong ka pule puthi, ngi la buh ïa ka jingthmu jong ngi na ka bynta ka roi ka par kaba pura jong ka jylla,” u la ban jur.
“Ka Sorkar MDA ka la mynjur ïa ka pisa na ka bynta baroh ki block ha kylleng ka Jylla. La pynthymmai ïa ka ophis synshar ha ki district bad ki block, kynthup ïa ki jingtei jong ki pulit. Ngi dang pynkhlaiñ ruh ïa ki jingtei jong ka koit ka khiah ha kylleng ka Jylla,” u la ong.
“Ka jingwanrah ïa ka jingsynshar kham jan sha ki briew, kam dei tang ka jingkren – hynrei ngi mut ïa ka bad ngi leh ïa ka ha ka rukom kaba ryntih,” u la bynrap.
U la shim ruh ïa ka kabu ban pyntip ïa ka jingshna ïa ka Mini Secretariat kaba dang ïaid shakhmat ha Jowai bad ha Pynrusla. “Ka jingpynbeit ïa ka bor synshar kan pynthikna ïa ka jingai jingshakri kaba paka sha ki paidbah”.
Ka Additional Secretariat kan don lai tylli ki Complex bad ka Chief Minister’s complex yn pyndep ha u bnai Kyllalyngkot, 2027.
“Ngi thmu ban plie ïa ka CM complex ha ka 21 tarik u Kyllalyngkot, 2027 bad ban ai ka jingshakri kaba ïar sha ki paidbah”, u la ong.
Ka Additional Secretariat kan don ki kamra na ka bynta u CM bad ka kynhun myntri jong u, u Chief Secretary bad kiwei kiwei ki ophis kiba heh. Kan don ruh ki ophis jong ki tnat Sorkar bapher bapher.
Ha kane ka jingbuh nongrim la don lang u Lamphang ka ïingdorbar u Thomas A Sangma, u Symbud Lamphang u Timothy D Shira, u Symbud Myntri Rangbah u Bah Snaiwbhalang Dhar, ki Myntri Sorkar ba kynthup ïa u AT Mondal, ka Kong Ampareen Lyngdoh, u Marcuise Marak, Bah Shakliar Warjri, u Rakkam A Sangma, Bah Paul Lyngdoh, Bah AL Hek, Bah Comingone Ymbon bad kiba bun ki MLA na rilum Garo.
