Shillong, Jylliew 19
U Superintendent of Police (SP) ka East Khasi Hills District, Bah Vivek Syiem, IPS, u la ong ba ki 5 ngut ki briew kiba la pynïap ïa u Raja Raghuvanshi ki la ïoh beit ïa kajuh ka bam kumba ïoh lem kiwei hapoh along kum ka ja, u dai bad u jhur.
Haba kren sha ki lad pathai khubor ha ka Sngi Palei ka 19 tarik u Jylliew, 2025 halor ka jingmih ki khubor ba ki 5 ngut kiba la donkti ban pynïap ïa u Raja Raghu-vanshi ki la ïoh da ka bam kaba kham kyrpang ha patok, na ka liang u Bah Vivek u la ong ba kitei ki 5 ngut kiba kynthup ïa ka kurim jong u Raja Raghuvanshi, ka Sonam Raghuvanshi, Raj Kushwaha, Akash Rajput, Vishal Singh Chauhan bad u Anand Kurmi ki la ïoh da kajuh ka bam kumba ïoh lem kiwei kiba don ha along bad kam don kano-kano ka jingai kyrpang ïano-ïano ruh.
Halor ka jingbym pat ïoh ïa kawei ka mobile phone jong ka Sonam Raghuvanshi bad ka jingjah ki ksiar jong ki shijur, u Bah Vivek u la ong na ka liang ki pulit ka Jylla Meghalaya ki dang leit ban wad ïa kawei ka mobile phone jong ka Sonam sha Indore bad ong ba lada ki lap ïa katei ka phone lehse, kin lah ruh ban ïoh biang ïa ki ksiar bad kiwei-kiwei ki tiar ba ka Sonam ka la buh.
U SP u la ong ba na ka liang ki pulit ka Jylla ki la leit ban khynra ïa ka ïingwai ba sah ka Sonam ha Indore hynrei la ïohi kumba la don mano-re-mano ba la pynkynriah ïa ki tiar sha kawei pat ka jaka, kumta na ka liang ki pulit ki dang pynlong ïa ka jingtohkit.
“Kumba ka paw la ïohi kumba la don ba pynkynriah da mano-re-mano bad na ka liang ka kynhun pulit ka dang pynthikna mano ba la shim ïa kitei ki tiar bad shaei kitei ki tiar baroh ki don,” ong u SP.
