Shillong, Jylliew 19
Ha ka jingbuddien halor ka khubor ba dang shu dep ban pyllait ha ka Sngi Balang ka 18 tarik u Jylliew da U Nongsaiñ Hima halor ka kam pynïap ba la leh da uwei u rangbah ïa uba la tip kyrteng kum Donald Sohtun uba la pynïap ïa la ka kurim ha ka ïingsah wai kaba don ha Nongrah Nonglum Brei, na ka liang u Superintendent of Police ka East Khasi Hills District, Bah Vivek Syiem, IPS, u la ïathuh ba une u rangbah u la pynïap ïa la ka jong ka kurim da kaba tied ïa ka da u maw.
Haba ïakren sha ki lad pathai khubor ha ka Sngi Palei, ka 19 tarik u Jylliew 2025, u Bah Vivek u la ïathuh ba ïa u maw ba la pyndonkam da une u rangbah ban pynïap ïa la ka kurim ki la lap najan katei ka ïing kaba ki sah wai ha Nongrah.
Kane ka samla kaba la ngat ha kane ka apot ka dei ba la tip kyrteng kum ka Priya Khongstia kaba don kumba 24 snem ka rta na ka shnong Umñiuh Tmar, katba u lok jong ka pat ba la tip kyrteng kum u Donald Sohtun u dei uba la don kumba 30 snem ka rta na ka shnong Mylliem Mawpynthih.
U Bah Vivek Syiem u la ong ba kane ka jingpynïap la suba ba ka lah ban dei hapdeng ka 25 bad 28 tarik u Jymmang 2025 bad ïa ka met ïap jong katei ka longkmie pat la lap da kaba kyllaiñ da ka Blanket.
“Na ka liang ki bor pulit ki la kem noh ïa u Donald Sohtun ha katei kajuh ka sngi ba ki la ïohpdiang ïa ka ejahar ha ka 30 tarik u Jymmang 2025 bad ka jingtohkit ïa u ruh mynta ka dang ïaid shakhmat,” la ong u Bah Vivek.
U Bah Vivek u la ïathuh ruh ba nyngkong ka la mih ka jingïania hapdeng kitei ki shi lok hadien ba u shynrang u la kynnoh ïa katei ka kynthei ba ka don jingïadei shawei ha shwa ba un tied ïa ka da u maw.
