Shillong, Jylliew 19
Ka India ka la shah pynngat ha kajuh ka group kynthup lang ïa ka Netherlands bad ka Slovenia na ka bynta ka jingïalehkai play-off jong ki kynthei ha ka Billie Jean King Cup ka ban long naduh ka 14 haduh ka 16 tarik Naiwieng mynta u snem.
Ka India ka la ïoh ruh ïa ka hok ban pynlong ïa kane ka jingïalehkai ha SM Krishna Tennis Stadium kaba ha Bengaluru. Kane kan dei ka sien kaba nyngkong ba ïa ka jingïalehkai playoff jong ka Billie Jean King Cup kan long ha ri India.
Ki lai tylli ki kynhun kin ïalehkai ha ka dur jong ka round robin league bad ka kynhun kaba jop kan rung sha ka Qualifiers jong u snem ban wan. Kumba long ha ka jingiakop ba la lah, ki jingïalehkai kin don ar tylli ki jingïalehkai sigles bad kawei ka jingïalehkai doubles. Baroh ki jingïalehkai kin long ha ka dur jong ka best of three tie-break sets.
Ka kynhun ïalehkai jong ka ri India kaba don 5 ngut ki ban ïashim bynta ki kynthup ïa ka Ankita Raina, Sahaja Yamalapalli, Shrivalli Bhamidipaty, Vaidehi Chaudhari bad ka Prarthana Thombare.
