Shillong, Jylliew 19
Ha ka jingkhynra kaba jur ïa ka jingkhaïi drok beaiñ, ki ophisar jong ka Customs Preventive, NER ki la lah ban khanglad ïa lai tylli ki jingpyrshang ban khaïi tuh, da kaba ïoh kurup shibun ki dawai Methamphetamine bad Heroin ha ka dor kaba la antad ba ka long T.30.17 klur.
Kine ki jingkhynra ki pyni ïa ka jingshimkhia jong ka tnat Custom ban ïaleh pyrshah ïa ka jingma jong ka jingshalan tuh ïa u drok bad ban ïada ïa ka ri na ki jingdih pynbuaid beaiñ.
Ka jingkhynra ba nyngkong ha Silchar: Ha ka 18 tarik Jylliew 2025, ki ophisar ka CPF, Silchar ha ka jingkhynra lang bad ki shipai BSF ki la bat ïa kawei ka kali Mahindra Bolero kaba la iehnoh ha Panibhora ha ka surok Mizoram-Silchar. Na katei ka kali, la ïoh kurup 79 tylli ki synduk sabon kiba don 885.56 gram u heroin bad 15 tylli ki synduk kiba don 15 kilo ki dawai methamphetamine na ka thliew ba la shna hapoh ka jaka shong jong katei ka kali. Ka jingïoh kurup baroh ka long T.22.15 klur. Ka jingtohkit kaba kham bniah ka dang ïaid shakhmat.
Ka jingkhynra ba ar ha Teliamura, Agartala: Katkum ka jingïoh jingtip ba kyrpang, ki ophisar jong ka CPF, Teliamura, Agartala, ryngkat bad ki shipai jong ka 28 Bn, Assam Rifles, ki la bat ïa uwei u briew uba shong ha ka kali arshaka (Bajaj 200 NS), hajan ka surok Bachaibari, Kamalpur-Khowai ha ka por kumba 21:30 shiteng synñia ha ka 18.06.2025. Ha ka jingwadbniah, la lap ba une u nongñiah u la kit haduh 4 tylli ki song heh kiba don 4.00 kilo ki dawai rong saw lam saw blad (ba la suba ba ki dei ki dawai Methamphetamine. La suba ba kine ki mar ki dei kiba la wanrah na Myanmar lyngba ka Mizoram ban pynpoi ha Agartala. Ka jingïoh kurup baroh ka long T.4.02 klur. La kem ïa uwei u briew ha kane ka jingjia.
Ka jingkhynra balai ka long ha Singerbil, Agartala: Ha ka 18.06.2025, ki ophisar ka Custom jong ka Singerbil CPF, Agartala ki la ïoh ban kurup ïa kawei ka mar kaba la suba ba ki dei ki dawai Amphetamine (Yaba) Tablet baroh ba khia haduh 4 kilo, kaba dang kit na Khowai sha Vijaynagar da ar ngut ki briew kiba shong da ka bike pulsar rongïong ka bym don registration number. Ki ophisar ki la bud ïa kane ka bike kumba 30 minit eiei lyngba ki jaka sañium shuwa ban ïoh kurup. La suba ba kitei ki dawai, ki dei kiba la shalan beaiñ lyngba khappud Mizoram-Tripura bad kiba dei ban pynpoi hajan Agartala.
Ka Custom ka dang ïai bteng ban ïakhun pyrshah ïa baroh ki jait kam beaiñ kiba ïadei bad ka jingshalan tuh ïa ki drok bad ki dawai pynbuaid, ka ksiar, sikret, ki mar kiba ïadei bad ki mrad khlaw, ki pisa India ba shna thok, ki kam thok ban wanrah bad shalan mar nabar ri bad ka jingpynïaid pisa beaiñ da kaba pynshong nongrim ha ka khaïi-pateng. Ka Custom ka ïatreilang bad kiwei pat ki tnat bapher-bapher ba pyntreikam ïa ka aiñ.
Uno-uno u lah ban kyrshan ïa ka jingïakhun pyrshah ïa ki kam beaiñ ha ki thaiñ khappud, ka jingkhaïi beaiñ bad ka jingkhaïi pisa da kaba ai jingtip sha ki Custom. Ïa ki kyrteng jong ki nongpyntip ym tang ba la buhrieh, hynrei ka don ka skhim ai khusnam kaba heh ruh, kaba khlem donkam siew khajna. Na ka bynta ki jingtip ba bniah shaphang ka skhim, sngewbha download ïa ka kotna ka athttps://old.cbic.gov.in/resources//htdocs-cbec/gst/reward-scheme-for-informers.pdf. Phi lah ban noh synñiang sha ka jingtei ïa ka ri da kaba ïarap ïa ka Custom ha ka jingïakhun pyrshah jong ka ïa ka jingkhaïi drok bad ki kam beaiñ ha ka liang ka pisa tyngka.
