Nongstoiñ, Jylliew 19
Ka Kyrshai Government LP & UP School, KJP Synod Sepngi Higher Secondary School bad ka Borsing Memorial Secondary School ki la long kum lahduh ha ka West Khasi Hills District Level Subroto Mukherjee Cup 2025 ba la pynlong da ka shlem trei kam jong ka District Sports Officer (DSO), West Khasi Hills ha ryngkat ka jingïatreilang bad ka Nongstoiñ District Sports Association. Kine ki kynhun kin mihkhmat na kane ka district sha ka Under-17 ki kynthei bad shynrang bad ha ka Under-15 ki shynrang sha ka State Level Subroto Mukherjee Football Cup 2025 ka ban sa long shen ha ka nongbah.
Ka jinglah ban pynthikna ka Kyrshai LP & UP School ha ka Under-17 ki kynthei ka la wan hadien ba ka la lah ban pynliem noh ïa ka Sib Singh Memorial Government Higher Secondary School da 3-0 kol ha ka jingïakhun final kaba la long ha ka Sngi Palei ha madan New Nongstoiñ.
Kumjuh, ha ka Under-15 ki shynrang, ka KJP Synod Sepngi ka la jop da 2-1 kol ïa ka St. John Bosco Higher Secondary School lyngba ka tie-breaker hadien ba ïakhaid ha ka jingïalehkai.
Haba phai sha ka final jong ka Under-17 ki shynrang, ka Borsing Memorial ka la pynliem noh ïa ka St. Xavier’s Higher Secondary School lyngba ka tie-breaker da 4-3 kol hadien ba ïakhaid mar 2 kol haduh kaba kut ka jingïalehkai.
Ïa ka nam Best Goalkeeper ha ka Under-15 ki shynrang la ïohpdiang da u Glostarfield Ïawphniaw na ka KJP Synod Sepngi, Top Scorer ka leit sha u John Willson Kharmaw na ka Don Bosco Secondary Mawkhlam bad Best Player sha u Aldrinstar Phyllut na ka KJP Synod Sepngi.
Nangta, ha ka Under-17 ki khynnah kynthei ïa ka nam Best Goalkeeper la ïohpdiang da ka Deisibel Ïawren na ka Sib Singh Memorial Government Higher Secondary School, Top Scorer sha ka Sinalin Shangrit na ka Kyrshai Government LP&UP School bad Best Player la ïohpdiang da ka Laihun Kharjahrin na ka St. Xavier’s Higher Secondary School.
Shuh shuh ha ka Under-17 ki khynnah shynrang ïa ka nam Best Goalkeeper la ïohpdiang da u Ripil Rmen Diengdoh na ka Borsing Memorial, Top Scorer sha u Edify Shyrkon na ka St. Xavier’s Higher Secondary School bad ïa ka Best Player la ïohpdiang da u Shemborlang Snaitang na ka Presbyterian Higher Secondary School Siejlieh.
Ha katei ka sngi la ïadon lang u Bah G.J.L Sangriang, Asst. Agriculture Engineer (Mech) West Khasi Hills kum kongsan ha ka jingdonlang ka Kong Balarina Syiem, DSO West Khasi Hills District, u Bah B.S Kharlor, President ka NDSA bad kiwei kiba la sam ruh ïa ki khusnam bapher-bapher sha ki khynnah.
