Tura, Jylliew 19
U Myntri Rangbah ka Jylla, Conrad K Sangma ha ka Sngi Palei, ka 19 tarik u Jylliew 2025, u la leit sha ka Education Conclave ha Tura, ha kaba u la ïakren bad ki nongshim bynta bad ki heh sorkar halor ki lad jingïarap ban kyntiew ïa ka kyrdan pule ha ka jylla.
Ha kane ka sngi la don lang ruh u Myntri ka tnad pule-puthi u Rakkam A Sangma, Vice Chancellor ka Captain Williamson Sangma State University, u Dr. Vasanthi Vijaykumar bad kiwei-kiwei.
Ha kane ka Conclave, u Myntri Rangbah ka Jylla u la pyllait paidbah ruh ïa kiba bun ki prokram ka sorkar kynthup ïa ka Meghalaya School Quality Assessment and Accreditation Framework (MSQAAF) bad ka CM IMPACT Meghalaya Learning Enhancement Programme (M-LEP). La sam ruh ïa ki Educational tablets sha ki khynnah kiba donkam ban shimkhia kyrpang.
Haba kren ha kane ka sngi, na ka liang u Myntri Rangbah u la kren halor ka jingdonkam ban ïatreilang bad ïatehlok bad ki seng bapher-bapher kum ka Mother’s Union ban nang pynmih kham bha ïa u soh ai jinghikai.
“Ka sorkar ka angnud ban ïatreilang bad ka imlang ka sahlang. Ka jingïatreilang kan mut ban ïatrei ryngkat bad ka sorkar ban pynmih kham bha ïa u soh ai jinghikai,” u la ong.
U Conrad u la kren ruh halor ka jingkongsan ka pule-puthi ban saiñdur ïa ka jingmut jingpyrkhat jong ki khynnah haba buh hakhmat ïa ka jingbun ki nongshong shnong dang rit ka rta ba ka long kum ka kabu bad ka jingtynjuh.
U la kdew ruh ïa ki jingthmu jong ka sorkar ban pynkylla ïa ka tnat pule-puthi, kynthup ban pynthymmai ïa ki skul bad ki kolej sorkar, ka jingseng ïa ka Captain Williamson Sangma State University, bad ka jingkynshew ha ki kam ïalehkai bad ka put ka tem. “Ki jingïarap jong ngi ki thmu eh ha ka ban plie lynti ïa ki samla jong ngi,” u la bynrap.
Ha kane ka Conclave la ïasoi ïa ka MoU bad ka Mothers’ Union Tura na ka bynta ban pynïaid ïa ki 20 tylli ki skul LP jong ka Sorkar.
U Myntri Rangbah u la kyntu ruh ïa baroh ki nongshim bynta ban ïatreilang ban wad ïa ki lad ki lynti ban weng ïa ki jingeh kiba ïakynduh ha ka tnad pule-puthi bad ban pynleit jingmut ha kaba noh synñiang ha ka rukom kaba bha sha ka roi ka par jong ka jylla.
Da kaba pynpaw ruh ba ka pule-puthi ka dei u païa ba kongsan eh ha ki mat pynroi jong ka sorkar bad ba ka jylla ka la kut jingmut ban kynshew ha ki khun samla jong ka.
Kane ka conclave ka la ai ïa ka rynsan ïathir ban ïamir jingmut bad ban ïasyllok kumno ban pynbha bad pynjanai ïa ka pule-puthi haba pynleit jingmut ban wad ïa ki lad ki lynti bad ban ïatreilang ban kynjoh ïa kajuh ka thong.
