Jowai, Jylliew 19
Ki shakri niam hapoh ka Raij Jowai, kynthup naduh u Dolloi, Pator, Langdoh, Sangot, ki Kñi jong ki Phra Kur Phra Kmai ryngkat ki waheh wasian ka Raij ha ka 19 tarik Jylliew ki la mih hakhmat ka ïew ka syiem ban pyndep ïa ka lehniam ‘Kbai Mooknor’.
Ka Kbai Mooknor, la leh ha shwa ban pyndep ïa ka Kñia Khang ka ban long ha ka 20 tarik Jylliew.
Shwa ba ki shakri niam kin mih shakhmat ka ïew ka syiem, ka la don ka jingïakynduh lang jong ki shakri niam ha Iung Langdoh ha kaba u Dolloi ka Elaka Jowai u la pashat ki kyntien sngewnguh bad ha kajuh ka por u la pynsngew ïa ki kam ba ka Dorbar Niam kan pyndep mynta u bnai.
Ïa ka kbai Mooknor, kaba la pyndep da u Chutia uba la pynkynmaw ruh sha ki nongshong ïew shong hat, ki nongleit ïew leit hat ba lashai ka sngi yn sdang ka niam ka rukom Kñia Khang.
