Imphal, Jylliew:
U Justice K. Somashekar, Chief Justice ka High Court jong ka Manipur bad u Patron-in-Chief jong ka Manipur State Legal Services Authority (MASLSA) u la leit jngoh ïa ka jaka sah ba shipor ha Mandop kaba don ha ka Ward No. 11, ka shnong Kangpokpi, kum shi bynta jong ka Promotional Legal Aid and Awareness Campaign. La synran ïa u da u Justice Alek Muivah, ki dkhot bad u Secretary jong ka MASLSA.
Ha ka jingkren jong u, u Justice Somashekar u la pynskhem biang ïa ka jingshimkhia jong ka tnad bishar ban ïada ïa ka hok jong ki jaitbynriew kiba don ha ka jingma.
U la ïaroh ïa ka jingïatreilang jong ki tnad sorkar, ki seng ba wanrah ïa ka jingïasuk, bad ki nongtrei mon sngewbha ha kaba ai jingïarap bad jingkyrshan ïa kito kiba donkam jingïarap.
Haba pynksan ïa ka jingdonkam jong ka jingnang jingstad, u la batai ïa ka kum ka jingdon jingem kaba kordor tam ban pynduh ïa ka jingshah kynnoh ha ka imlang-sahlang bad ban ïoh ïa ka jingpynkupbor.
U la kdew sha ki kyndon jong ka Riti synshar kiba pynthikna ïa ka jingïarap na ka bynta ka aiñ khlem jingsiew na ka bynta ki jaitbynriew riewlum bad u la ban jur ba ka jingïaryngkat ha khmat ka aiñ ka dei ban long ka nongrim ba ïalam.
U la kyntu ïa ki paidbah ba kin long kiba husiar ha kaba pynneh ïa ka hok bad ban pynroi ïa ka imlang-sahlang kaba hok bad kaba kynthup lang ïa baroh.
U Justice Alek Muivah, Secretary ka MASLSA, u la ai jingkren ruh sha ki nongshong shnong bad ki heh sorkar, da kaba pynpaw ïa ka jingpynthikna jong ka Riti synshar ka ri ban ai jingïarap aiñ khlem jingsiew katkum ka Article 39A.
U la kdew ïa ki lad jingïarap ha ka liang ka aiñ ba kongsan kum ka National Legal Services Authority (NALSA) bad ki Lok Adalats, kiba thmu ban ai ïa ka hok ïa kiba duk bad kiba shah iehnoh beiñ.
U la ïasam ruh ïa ki jingtip ba bniah shaphang ka laiñ jingïarap aiñ ba khlem jingsiew, kaba lah ban ïoh da baroh kiba wad jingïarap.
La sam ïa ki tiar jingïarap sha ki 38 tylli ki longïing kiba sah ha katei ka jaka sah ba shipor da u Justice Somashekar bad ka kynhun jong ka MASLSA.
Ka Senapati bad Kangpokpi Bar Association ki la ai ruh ïa ki jaiñ tawah sha baroh arngut ki Nongbishar kum ka dak ka jingsngewnguh ïa ka jinglehbha jong ki.
Ha kane ka sngi la wan ban ïashim bynta da u Deputy Commissioner (DC), Superintendent of Police (SP), Additional District Magistrate (ADM), ki dkhot ka MASLSA, ki ophisar na ka Senapati bad Kangpokpi Bar Association, ki District Level Officer (DLO), bad kiwei kiwei.
