Nongpoh, Jylliew 19
U President ka Muay Thai Associa-tion of Meghalaya (MTAM), Bah Angelus Sun ha ka step jong ka Sngi Palei u la ai khublei kitbok-kitrwiang ïa ki san ngut ‘rang bad ‘thei ïalehkai ka Jylla ban mihkhmat ïa ka ri India hapoh ka lama jong ka United Muaythai Association of India (UMAI) ban shim bynta ha ka Asian Muaythai Championship 2025 ka ban sa long ha ka nongbah Thai Nguyen Province jong ka ri Vietnam naduh ka 20 haduh 26 tarik mynta u bnai.
Kine san ngut ki kynthup ïa u Bansahnamkyrpang Warkhyllew na ka shnong Nongkrem ha ka kyrdan ïalehkai 45kg, kumjuh u Aristone Syiemsad na ka shnong Mawdiang-diang ha ka kyrdan ïalehkai 57kg, u Teiboklang Marbaniang na ka shnong Mylliem ha ka kyrdan ïalehkai 51kg, ka samla Mary Christine Riang na ka shnong Umsaitsning ha ka kyrdan ïalehkai 45kg bad ka samla Anita Rai na ka shnong Nongpoh ha ka kyrdan ïalehkai 48kg.
U Bah Angelus haba kren ha kane ka sngi, u la ai ka jingkhublei kaba kyrpang ïa ki kmie ki kpa jong kine ki ‘thei bad ki ‘rang ïalehkai ka Jylla, kiba la bei hi na la ka pla shimet ka jong ki ïa baroh ka jinglut jingsep kaba poi haduh T. 1.25 lak marwei bad pynpaw ruh ïa ka jingkyrmen skhem ba ka Sorkar Jylla kan ai ïa ka jingïarap pisa sha kine ki khynnah kiba mihkhmat ïa la ka ri kumba long ha ki por ba la dep.
Kumjuh, u la ai ruh ka jingkhublei kaba kyrpang sha u Myntri Rangbah ka Jylla, u Conrad K Sangma uba la don bynta ban kyntiew ïa ka kam ïalehkai Muaythai ha ka Jylla bad ruh ïa u Myntri ka tnat ïalehkai ha ka Jylla, u Bah Shakliar Warjri, ka tnat Directorate of Sports & Youth Affairs bad ruh ïa ka Meghalaya State Olympic Association (MSOA) ba ki ‘rang bad ki ‘thei ïalehkai Muaythai ka Jylla ki ïoh ïa ka baibam naduh ki jingïalehkai ha ka Jylla, ha ka ri bad wat shabar ri kumjuh bad ki ïoh ruh ïa ka khusnam pisa halor ka jingjop bad ka jingwanrah nam bad burom ka jong ki.
Kum u President ka MTAM, u la pynpaw ruh ka jingkyrmen skhem ba kine ki khynnah ïalehkai ka Jylla kiba la mih mynta ka sngi sha Vietnam, khlem pep kin wanrah ïa ka nam ka burom ym tang ïa ka ïing ka sem, ka shnong ka thaw jong ki, hynrei ïa ka jylla bad ka ri hi baroh kawei.
