Shillong, Jylliew 19
Ka meiieid jong u Raj Kushwaha ïa uba la kynnoh ba u don jingïadei bad ka Sonam Raghu-vanshi, ka la khlad noh na ka jingpang kyndeh shadem ne ‘Heart Attack’ ha ka Sngi Balang ha ïing sah jong ka ha ka shnong Rampur kaba hap ha Fatehpur District ha Uttar Pradesh.
U Darbari Singh uba dei u kurim jong ka meiieid u Raj, ka Ram Lali, 74 snem rta, u la ïathuh ba naduh ba u Raj u la shah kem ha kaba ïadei bad ka jingshah pynïap dusmon jong u Raja Raghuvanshi, u kurim ka Sonam, ka ju kyrshan bad ïashah ïa u Raj da kaba ka la kam ba u Raj u dei uba lui-lui bad u la shu shah pharep.
Katkum ka khubor ‘The Print’, u paieid jong u Raj, u Darbari Singh u la ïathuh ba ka Ram Lali ka la khlad na ka daw ka jingsngewsih halor ka jingshah kynnoh ba u Raj u dei uba la donkti kum u nongsuhbuit uba hakhmat eh ban pynïap ïa u Raja Raghuvanshi.
Ha ka taïew ba la dep ka meiieid u Raj ka la kren sha ki lad pathai khubor bad ïashah ïa u Raj, da kaba ong ba u Raj um don jingïadei badno-badno hynrei ka Sonam ka dei kaba pynïap ïa la u kurim bad kynnoh pat ïa u Raj.
Ka la kynnoh ruh ba ki lah ban don ki ‘riew donbor kiba donkti lang halor kane ka kam ban pynïap ïa u Raj na kata kadaw ki lah ban leh katba mon.
Katba u paieid jong u Raj pat u la ong ba u Raj u dei uba jai-jai ha ka ktien ka thylliej, bad uba don ka jingkitkhlieh ïa ka ïing ka sem naduh ba la khlad noh u kpa jong u ha ka por Covid.
U Raj Kushwaha, 20 snem rta u dei uba trei kum u Accountant ha ka karkhana ba la pynïaid da ka ïing ka sem jong ka Sonam uba la kynnoh ba u don jingïadei bad ka Sonam bad u dei uba la shah kynnoh kum u nongsuhbuit ba hakhmat eh ban pynïap ïa u Raja kurim jong ka Sonam ha Sohra.
