Washington, Jylliew:
Tang hadien katto- katne kynta ba u nong-ialam ba hakhlieh jong ka Iran- u Ayatollah Ali Khamenei u la maham ia ka US bad ia u President ka US ba kim dei ban tuklar halor ka jingiakynad hapdeng ka Iran bad ka Israel, ha kaba u la byrngem ruh ba ka US kan ioh la ka bainong lada ka leit ban tuklar ha katei ka jing-iakynad.
Haba ai jingkren ha ka jingialang bad ki nongthoh khubor ha ka iing White House, U Trump u la kren shaphang la ka America kan iasoh ne em bad ka Israel ha ka jinghiar thma shipai jong ka pyrshah ia ka Iran ban pynthikna ba ka Tehran kan nym pynmih ia ki tiar ialeh nuclear. Da kaba plie ia baroh ar ki lad, u President ka US u la ong, “Nga lah ban leh, nga lah ban ym leh – ym don ba tip ia kaei kaba ngan leh.” Tang katto katne kynta mynshwa, u Nongialam ba ha khlieh duh jong ka Iran u la ong ba ka Iran “kan ym aiti satia”. Une utei u rangbah u la jubab halor ka jingkhot jong u Donald Trump ban aiti noh khlem jingteh” na ka liang ka sorkar Tehran.
Ha kajuh ka por, ki shipai iada ri jong ka Israel lane ka IDF ki la ong ba ka Iran ka la siat ia ki namding ha ki nongbah jong ka Israel, “da kaba thmu ia ki riew paidbah ha ka sngi kaba hynriew lynter”. La iohsngew ia ki siren ha kylleng ki jaka jong ka Israel ha ka janmiet jong ka sngi thohdieng, kaba la maham ia ki nongshong shnong, ba kin mareh sha ki bunker, haduh ban da pynbna da kumwei pat.
Ha ka Sngi Ba-ar, u Donald Trump u la ong, “Ngi tip shano u rieh. U (Khamenei) u long u thong ba suk eh ia ka US lada ka mon, hynrei u don ha ka jingshngaiñ hangtei, ngim kwah ban sei ia u shabar ( ban pyniap!), la kumno kumno ym ia mynta hi. Hynrei ngim kwah ban iohi ia ki namding ba kin pynmynsaw ne shim ia ka jingim jong ki riew paidbah, lane ia ki shipai ka America.” Hynrei u Trump u la maham ba ka jingiaishah bad ka jingshaniah jong ka US ia ka Iran ka la sdang hiar bad duna namar ki jingleh lade hi jong ka Iran.
Ka Israel ka la ong ba ka dang ïakynduh beit bad ka America halor ki jingjia ha katei ka jingïakynad. Baroh ar tylli ki paralok ki mynjur, kumjuh ruh ki ri G7, ba ka Iran kam lah ban don ïa u tiar nuclear ha kano kano ka jinglong jingman. Katba ka Israel ka la dep ban thmu bad pynjot ia ki katto katne ki jaka shna nuclear jong ka Iran ha kaba ka Tehran ka dang pynriewspah ia u uranium ha ka kyrdan kaba kham shalor, ki don katto katne ki jaka kiba don shapoh khyndew ne hapoh ki krem ha ki lum. Na ka bynta kane ka Israel ka donkam ia ka jait tiar kaba kyrpang kaba tang ka ri America ka don.
