Shillong, Jylliew 19
U rangïalehkai shakhmat jong ka Real Madrid, u Kylian Mbappe, u la shah sumar ha hospital, na ka daw jong ka jingpang kpoh bad u lah ban duh mih madan ha baroh ki jingïalehkai group jong ka FIFA Club World Cup 2025, kaba dang ïaid mynta ha ka ri America.
“U rangïalehkai jong ngi u Kylian Mbappe u don ïa ka jingpang (acute gastroenteritis) bad u la shah sumar ha hospital na ka bynta ki test bad ki jingsumar bapher bapher,” ong kane ka kynhun ïalehkai jong ka La Liga ha ka kyrwoh.
Utei u rangïalehkai ka France um shym la don satia ruh na ka jingïalehkai jong ka Madrid ha ka group stage pyrshah ïa ka Al Hilal ka Saudi Pro League. Kane ka jingïakhun ka la kut noh ha ka jingïakhaid mar 1-1 kol.
Ka tyllong khubor ka ïathuh ba u Mbappe, uba la shah pynkit sha jaka sumar ha ka sngi Balang, u la shah pynkyrpang na ki paralok jong u naduh ka sngi Ba-ar bad la thikna ba un ym lah ban ïadon bynta ha ki jingïalehkai group jong ka Club World Cup.
Na ka liang u coach u Xabi Alonso u la pynpaw ha ka sngi Balang ba u Mbappe u don hapdeng ka jingartatien na ka bynta ka jingïalehkai ban wan jong ka Real, pyrshah ïa ka kynhun ïalehkai na Mexico ka Pachuca ka ban long ha ka Sngi U Blei ha Charlotte, NC.
U Mbappe u la pynïasoh sha ka Real na ka Paris Saint-Germain shwa ka samoi ïalehkai 2024-25. U la ïoh ban thep 31 kol na 34 tylli ki jingïalehkai ha ka lympung La Liga, katba u la thep 6 kol na 14 tylli ki jingïakhun ha ka UEFA Champions League.
Ha kane ka Club World Cup ba la pynthymmai, ka Real Madrid ka don ha ka Group-H ryngkat bad ka Al Hila, RB Salzburg, bad ka Pachuca. Ka kynhun jong ka Austria ka Salzburg ka dei kaba lamkhmat haduh mynta hadien ba ka la lah ban pynliem ïa ka Pachuca da 2-1 kol.
