Shillong, Jylliew 19
Ka Meghalaya ka la wan ha ka kyrdan sha trai duh ha ka ‘Performance Grading Index 2.0 Report’ jong u snem 2023-24 kaba la pyllait da ka tnat pule-puthi ha ka Sngi Balang ka 18 tarik Jylliew 2025 katba ka Chandigarh ka la wan ha ka kyrdan ba ha khlieh duh.
Ka Performance Grading Index (PGI) ka dei kaba la pynmih da ka tnat pule-puthi ne Ministry of Education ka Sorkar India ba la sdang ha u snem 2017-2018 ban peit ïa ka rukom treikam ki skul ha baroh kawei ka ri India.
Ka PGI ka bishar bniah ïa ka rukom treikam ki skul la ka long ha jingbiang ne jingbymbiang ha ki jingtei ïa ki ïingskul la ka long ki kamra klas, ki jaka leit shabar, ka jingdon ïa ki umbam umdih kiba khuid, ki bording ilektrik, ki library, ki sport, ki uniform ïa ki khynnah skul, nangta ka jingbiang ne jingdkoh ha ka rukom treikam ki skul, ka jingduna ki khynnah skul, ka jingbym lah ban ai ka bhah pisa ïa ki skul bad kiwei-kiwei.
Ka Chandigarh ka la ïoh haduh 719 na ka 1000 poiñ ha ka PGI da kaba poi sha ka thup ba nyngkong kaba la tip kum ka Prachesta-1 kaba la ïoh hapdeng ka 701-760 ki poiñ.
Ki don 10 tylli ki jylla bad ki Union Territory hapoh ri India kiba la poiñ hapdeng ka 581 bad 680 bad kine ki dei kiba la poi sha kata ka kyrdan ba la khot Prachestra-3, kiba kynthup ïa ka Punjab, Delhi, Gujarat, Odisha, Kerala, Dadra Nagar Haveli and Daman Diu, Haryana, Goa, Maharashtra, bad Rajasthan.
Katba ka Meghalaya ka la poiñ 417 ka hap hapoh ka thup ba la tip kum ka Akanshi-3, hapdeng ka jingïoh 401-460 poiñ.
Kiwei pat ki jylla bad ki Union territory kiba dang donkam shibun ban pynbha ïa ka pule-puthi ki long ka Telangana, Assam, Jharkhand, Tripura, Manipur, Chhattisgarh, Bihar, Nagaland, Mizoram, bad Arunachal Pradesh kiba la hap ha ka thup Akanshi-2, kiba ïoh 461 bad 520 poiñ.
Katba kiba ïoh ha ka kyrdan ba kham pdeng ki long ka Puducherry, Himachal Pradesh, Andaman and Nicobar Islands, Tamil Nadu, Karnataka, Lakshadweep, West Bengal, Madhya Pradesh, Sikkim, Uttar Pradesh, Jammu & Kashmir, Uttarakhand, and Ladakh, kine ki dei kiba poiñ 521 bad 580 kiba hap ha ka thup Akanshi-1.
Lah ban kdew ba ka jingpoi ka Meghalaya sha ka kyrdan ba shatrai duh ha ka PGI ka dei lehse namar ka jingbun ki skul kiba don bun tylli ki thup ne ki kyrdan ha kawei ka ïing skul, kita ki long ba ha kawei ka ïing skul ki don 2 tylli ki jait skul kata ka SSA bad ka Deficit bad kiwei-kiwei, kaba wanrah ka jingdkoh ha ka rukom pyntreikam ban ai ïa ki skhim ne ki jingïarap kaba ka Sorkar ka dang ïaleh haduh mynta ban buh noh tang kawei ka skul ha kawei ka ïing skul.
