Shillong, Jylliew 19
Ka almanak ïalehkai 2025 -26 jong ka All Indian Football Federation (AIFF) ka la wanrah ka jingkylla kaba khraw haba ym shym la pynpaw eiei halor ka Indian Super League (ISL), kaba long ka lympung ïalehkai kaba heh duh hapoh ka ri.
Ïa kane ka lympung ïalehkai ISL la pynïaid da ka Football Sports Deve-lopment Limited (FSDL) ha kaba la sdang naduh u snem 2014 bad ka la long ka lympung kaba hakhlieh hapoh ka ri naduh u 2019.
Hynrei ka lawei jong kane ka lympung kam long kaba thikna namar ka jingïateh soskular jong ka Master Rights Agreement (MRA) kan kut ha u Nohprah mynta u snem bad haduh mynta ym pat shym la pynthymmai ïa ka.
Ha u Ïaïong, ka Executive Committee jong ka AIFF ka la thaw ïa ka kynhun treikam kaba don 8 ngut ki dkhot ban ïakren ïa ka lawei jong ka MRA bad ka FSDL, hynrei kam shym la don kano-kano ka rai kaba kut halor kane ka mat, kaba la pynlong ïa ki klob ban sah ha ka umdum bad ruh na ka bynta ka samoi ka ban wan.
Kane ka jingbym lah ban pynthikna ka la buh jingeh ïa ki jingthmu jong ki klob kiba bun namar ba kim shym la lah ban kular ïa ka tarik ne ka jingkhang na ka bynta ka league.
Ha ka samoi ïalehkai 2025-26, ka lympung ïalehkai phutbol jong ki shynrang (senior) kan sdang da ka Durand Cup, katba ïa ka Super Cup yn pynïalehkai hadien kata, ha ka jaka ba kan long hadien ka ISL kum ka jingïalehkai ba khatduh jong ka samoi ba la lah.
Kane ka jingleh ka wan kham bunsien namar ka jingbym wan ki nongkyrshan sha kane ka lympung bad ki klob ki phah ïa ki kynhun (reserve ne youth teams) sha ka Cup, da kaba kheiñ ïa ka kum ka jingïalehkai kaba ar.
