Shillong, Jylliew 19
Ki runar bym lah ban tip ki dei kiei, ki la shna da ki ‘website’ thok jong kawei na ki ïingbasa kaba don ha nongbah Shillong ban thok bad shukor na bynta ban kamai spah ei na ki briew.
Katkum ka khubor kaba la ïoh na ki pulit la ong ba u Harfot Singh jong ka Hotel Polo Towers, Shillong u la ai ka jingujor ba ka la don ka ‘website’ thok jong ka Hotel Polo Towers, Shillong bad Polo Orchid Resort, Sohra ha East Khasi Hills kaba la shna thok da ki runar bym lah ban ithuh na ka bynta ban thok bad shukor pisa na ki nongleit sha kine ki ïingbasa bad ruh ïa ki paidbah.
La ong ba kane ka jingshna thok ïa ka ‘website’ ka la wanrah ka jingeh kaba khraw ïa ki briew kiba thmu ban leit sah ha kine ki ïingbasa bad kaba la wanrah ruh ïa ka jingduhnong kaba khraw ïa kitei artylli ki ïingbasa.
