Shillong, Jylliew 19
Ki runar kiba la leit ban tuh ïa ki CPRC pipes na kawei ka dukan, kim shym la poi pyrkhat ba ki la shah ring dur pat ha ka kor CCTV katba ki dang leh ïa kane ka kam tuh.
Katkum ka khubor na ki pulit la ong ba u Vidan Chettri u la ai ka jingujor sha ki pulit ba ha ka 15 tarik mynta u bnai, ha ka por kumba 11.06 mynmiet, uwei u briew ba la tip kyrteng kum u Kamal Chettri ha ryngkat bad ki paralok jong u, ki la tuh haduh ar song ki CPRC pipes kiba shongdor kumba T.20,000/- na Laxmi Transport Agency, Demseiñïong, Shillong. La ong ruh ba kane ka jingjia baroh, la ïoh ban ring hapoh ka kor CCTV kaba la pyndait ha kane ka jaka.
Ha kawei pat ka khubor, u Sabian Lynrah u la ai ka jingujor sha ki pulit ba ha ka step jong ka 17 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AD-0130 na ka jaka sah ka jong u, kaba don ha Mawkasiang, East Khasi Hills.
