Shillong, Jylliew 19
Hadien ka jingmih noh jong u General Secretary ka United Democratic Party (UDP), Dr. Jemino Mawthoh ha kine ki khyndiat sngi ba la dep, na ka liang u Bah Metbah Lyngdoh kum President Rangbah jong ka seng u la ong, ba ka Central Executive Committee (CEC) jong ka seng kan sa shong pyrkhat ha shwa ban kut jong une u bnai Jylliew lane ha ka taïew ba nyngkong jong u bnai Naitung.
U Bah Metbah u la pynpaw ïa kane haba ïakren bad ki lad pathai khubor ha ka Sngi Balang ka 18 tarik u Jylliew 2025 ha kamra treikam jong u kaba don ha Secretariat.
U la pyntip ba ka seng hi ka la pdiang ïa ka shithi iehnoh kam jong u Dr. Jemino Mawthoh kum General Secretary bad ka seng kan sa shong pyrkhat biang ban jied thymmai ïa u General Secretary jong ka UDP.
“Ka seng kan sa jied thymmai noh ïa u General Secretary ha kine ki khyndiat sngi ban wan,” la ong u Bah Metbah.
Kum ban shu kdew hangne, u Dr. Jemino Mawthoh u la phah ka shithi iehnoh kam kum u General Secretary ka UDP sha u President rangbah ka seng u Bah Metbah Lyngdoh ha ka 31 tarik u Jymmang 2025.
U Dr. Jemino Mawthoh u dei MLA barim jong ka United Democratic Party (UDP) na Nongthymmai Konstitwensi bad u la bat ïa ka kam General Secretary jong ka seng kumba shiphew snem tam eiei.
