Jowai, Jylliew 20
Ha ka sienjam kaba kongsan ban kyntiew ïa ka jingpynrung ïa ka Digital ha ka pule puthi, ka ophis jong u Deputy Commissioner, West Jaiñtia Hills District, Jowai ka la sam 200 tylli ki kompiwtor sha 14 tylli ki skul hapoh ka West Jaiñtia Hills District.
Ïa kine kompiwtor ba hap hapoh ka Pradaan Mantri Khannij Kshetra Kalyan Yojsna ((PMKKKY) Scheme la bei tyngka da ka District Mineral Foundation (DMF) bad la buh thong ban sam sha baroh ki skul Secondary bad Higher Secondary Schools.
La sam ïa ki kor kompiwtor sha ki nongmihkhmat jong ki 14 tylli ki skul da u MLA ka Jowai bad Chairman MUDA, Bah Wailadmiki Shylla haka jingïalang kaba la pynïaid da u Bah G.L.C Mylliem, Assistant Commissioner ha Conference Hall ka ophis u DC ha ka 20 tarik Jylliew.
U Bah Wailadmiki Shylla ha ka jingkren u la ban jur halor ka jingdonkam jong ka jingnang jingstad ha kane ka juk mynta. U la pynpaw ruh ka jingsngewskhem ba ka sienjam ba la shim da u Deputy Commissioner kan kyntiew shibun ïa ka pule puthi jong ki khynnah pule ha kane juk teknoloji.
U Bah Wailadmiki u la ai khublei ruh ïa u Deputy Commissioner halor ka jingïalam bad ka jingpyrshang jong u ban kyntiew ïa ka kyrdan pule ha ka district.
U la pynshlur ruh ïa ki nonghikai ban ïasam ïa kino kino ki jingeh kiba ki ïakynduh, khamtam eh ha kaba ïadei bad ki jingtei jingshna bad u la pynthikna ruh ba kin bteng ban ai jingkyrshan.
U Deputy Commissioner, Abhinav Kumar Singh, ÏAS u la pyntip ba ha ka bynta kaba ar jong kane ka sienjam kaba kongsan, yn pyntreikam ïa ka rukom ai jinghikai ba la pynbiang da ka Microsoft, ha kaba yn hikai ïa uwei u nonghikai na kawei-pa-kawei ka skul bad u la pynshlur ruh ban pynbun ïa ka jingpynrung kyrteng ha ka sobjek Computer namar kumba long mynta ka duna bha ki samla ka distrik kiba shim ïa kane ka sojek.
Ki skul kiba la ïohpdiang ïa ki kor computer ki long, ka Sohkha Government Higher Secondary School kaba la ïohpdiang 17 tylli. Ka Government Boys’ Higher Secondary School, Jowai 23 tylli, ka Kiang Nangbah Govt Higher Secondary School, Jowai 26 tylli. Kumjuh ka Government Girls, Higher Secondary Jowai 20 tylli.
La bhah ïa ka Jowai Public School Jowai bad Government UPS Mowkaïaw & RMSA mar 13 tylli. Kumjuh ka Shangpung RMSA Secondary School, Jowai RMSA Secondary Schoool, Government Senior Basic & RMSA Higher Secondary School Mynso bad Nongtalang Government Secondary School mar 12 tylli ki computer.
Nalorkata la bhah ruh ïa ka Shkenpyrsit UP SSA & RMSA Secondary School, Mustem SSA UP & RMSA Secondary School, Barato Government UP & RMSA Secondary school bad Trangblang Government UP & RMSA Secondary School mar 10 tylli ki kor computer.
