Shillong, Jylliew 20
Ha kawei na ki jingjia kaba sngewsih kawei ka ïing kaba don ha Kynshi Mawteijrong kaba hap hapoh ka Eastern West Khasi Hills District ka la ingkhong khait lut hadien ba ka ding kaba rhem bad klang ka la bam duh kynsan ïa katei ka ïing.
Kane ka jingjia ka la jia ha ka step phyrngab jong 19 tarik u Jylliew 2025 ha ka por kumba 2:30 eiei. Kane ka ïing kaba la pluh ka dei ka ïing trai jong i Kong Medalin Dkhar bad ha kane ka ïing pat la sah da ka khun jong ka, Kong Lawansuk Dkhar.
Katkum ki dur khih la sakhi ba ka jingpluh jong katei ka ïing ka la shyrkhei bha bad ka ding kaba la klang bha shajrong, ha kaba wat tang khyndiat ruh ki jingdon jingem jong katei ka ïing ym shem la ieh bad ka ding ka la bam duh ïa baroh khoit.
Na ka liang u Secretary jong ka shnong Kynshi Mawteijrong, Bah Dondorsing Syiemlieh, u la ïathuh ba ïa ka daw jong ka jingpluh katei ka ïing ym lah ban tip bha, namar hapoh jong katei ka ïing ym shem la don briew ha ka por ba ka pluh kynsan.
U la ong ba nyngkong u dang mut ba dei ki riewsniew ne ki nongtuh namar kim pyrkhat ba kane ka jingjia pluh ïing namar mynta ka dei ka por lyiur bad kam ju jia pluh ïing ha ka por lyiur, hynrei hadien ba u la leit poi sha katei ka jaka ba pluh la lap ba ki trai ba sah ha katei ka ïing kim shym sah bad ki leit sah sha ïing ki paramarjan.
Ha ka por ba pluh katei ka ïing kim lah shuh ban leh eiei namar ka por ruh ka dang dei ba ki paramarjan ki dang ïa thiah bad kim lah shuh ban pynlip ïa ka ding kaba klang nalor ka um ruh ka duna bha bad ka ding ka la shu bam duh ei ïa katei ka ïing, u la ong.
U la ïathuh ruh ba baroh ki jingdon jingem hapoh katei ka ïing ki la ingkhong lut, ba kynthup naduh ki kot skul, ki kot donkam, ki tiar barit ba ju pyndonkam ha ïing, ki jingbam baroh bad kiwei kiwei.
“Mar shu ïoh jingtip halor kane ka jingjia na ka liang jong ka Block bad ka tnat pulit mar-mar ki la wan ban jurip ïa katei ka jingjia,” la ïathuh u Bah Dondorsing.
Na ka liang ka Kong Lawansuk Dkhar kaba sah ha katei ka ïing, ka la ïathuh ba ha katei ka sngi ba pluh ka ïing ki khlem sliew ding eiei, da kaba ong ba ka jingpluh ka ïing ka lah ban dei na ka bording ilektrik namar naduh ka por 6:30 janmiet eiei jong ka 18 tarik u Jylliew 2025, ka la mih na ïing ryngkat bad ki khun ban leit sah sha ïing jong ki paramarjan.
Ka la ïathuh ruh ba ha katei ka sngi ba pluh ka ïing kim shym la sah ha ïing la jong namar ba u lok jong ka, u leit bylla shajngai bad ka tieng ban sah tang bad ki khun. Kumta ki la leit ban sah noh sha ïing jong ki paramarjan.
