Jowai, Jylliew 20
U MLA ka Jowai, Bah Wailadmiki Shylla u la leit ban jurip ïa ka Kiang Nangbah Government College, Jowai myn ha ka 20 tarik Jylliew na ka bynta ban bishar bniah kumno ban pynbha pynmiat ïa ka.
Ha kane ka jingleit jurip u MLA la donlang ka Principal ka LM Darnei, ki ophisar ka PWD nalor kiwei.
U MLA u la leit ban jurip ïa ki bynta jong ka kolej naduh ka Canteen, ka jaka ba thmu ban tei ïa ka Quarter jong ki nonghikai, ka Auditorium kaba la jot rathai, ki kamra klas nalor ka Library.
Hadien ba la dep ban jurip bad ïakynduh ïa ki bor pynïaid jong ka Kiang Nangbah Govt College, u Bah Wailadmiki u la ong kane kam dei ka sien nyngkong ba u wan jurip ïa ka kolej bad lada peit ïa ki sawdong sawkun jong ka kolej ruh k la don ka jingkylla, hynrei kaei kaba hakhmat eh ïa u kum u MLA u la ong ka jingduh klas jong ki khynnah khamtam ha ka por Admission ka dei ka jingeh kaba ka kolej ka mad na ki snem sha ki snem.
Halor kine ki jingeh baroh, u Bah Wailadmiki Shylla u la pyntip ba u la dep ban pynsngew sha u Myntri Rangbah ka Jylla ha ka por ba u wan sha Jowai bad na ka liang jong u Myntri Rangbah ruh u la kular ban pynheh ïa ka kolej.
Ha kaba ïadei bad ka jingpynbha pynmiat ïa ka kolej naduh ki Additional Classrom na ka bynta ki tnat bapher bapher, ka Auditorium, ka jingpynheh ïa ka Canteen, ka Quarter nalor kiwei, u Bah Wailadmiki u la pyntip ba la pynkhreh ïa ka Plan kaba kot la kumno kumno 30 klur tyngka khnang ban phah sha ka sorkar ba kan leh ïa kaba donkam na ka bynta ka jingmyntoi jong ki samla pule.
