Shillong, Jylliew 20:
U hynmen jong u Raja Raghuvanshi, u Vipin Raghuvanshi u la kam ba ka Sonam Raghuvanshi kam pat shym la phla ha kaba ïadei bad ka jingshah pynïap u Raja.
U la ong ruh ba ma ka bad ki saw ngut kiwei pat kiba la shah kem lang ki pyrshang ban ïalam bakla ïa ki pulit halor kaei kaba la jia ïa u para jong u.
Katkum ka khubor ANI, u Vipin u la dawa ba dei ban pan por sa phra sngi khnang ba ki pulit kin ïoh ban tohkit biang ïa ka Sonam bad ki 4 ngut.
U la ong ruh ba ka Special Investigation Team (SIT) jong ki pulit ka Meghalaya ki la leit ruh sha Indore ha ka Sngi Balang ban shim jingkylli na ki bahaïing ka Sonam.
Lah ban kdew ba ka ïingbishar hynnin ka sngi ka la ai por biang sa ar sngi ïa ki pulit ban tohkit ïa ka Sonam bad u Raj Kushwaha, katba ïa ki lai ngut kiwei pat la phah sha judicial custody na ka bynta 14 sngi.
Kum ban shu pynkynmaw ki pulit ka East Khasi Hills District ha ka 17 tarik Jylliew ki la leit ïalam ïa ka Sonam Raghuvanshi bad ki lai ngut ki paralok kiba shah kynnoh donkti ban leit pyni biang ïa ka rukom pynïap jong ki ïa u Raja Raghuvanshi ha Weisawdong hadien ba ki la phla ha ki pulit.
