Shillong, Jylliew 20
Ka Mawryngkneng Sports Club (MCSC) ka la pynlong ïa ka jingïalang kyrpang ha Jubilee Secondary School, Mawryngkneng ban pynkup burom ïa ki samla kiba la wanrah ka jingjop kum ki lahduh jong ka SSA 3rd Division Football Tournament 2024 bad kiba la ïoh ban kiew sha ka SSA 2nd Division na bynta u snem 2025.
Ka jingïalang kaba la pynlong da ka club la sakhi da ki paidbah ka shnong, ki kmie ki kpa, ki rangbah shnong bad ki dkhot ka club. U Bah Heavingstone Kharpran, MLA ka Mawryngkneng, u la long kum kongsan ha kane ka sngi, katba u samla Pynbiangbor Lawrniang u la pynïaid ïa ka jingïalang.
La pynkup burom da ki syrnod, ki memento sha 22 ngut ki ‘rangïalehkai jong ka Mawryngkneng SC, kynthup ruh ïa u Banker Myrnsong uba la ïohpdiang ïa ka nam Top Scorer jong ka Tournament. La ai burom kyrpang ruh sha ki Coaching Staff.
