Shillong, Jylliew 20
Namar ka jingwanrah jingeh ha ka jingkyrduh palat ka umbam-umdih hapoh ka shnong Mawlai, na ka liang ka Seng Samla Mawlai Pyllun ha ka 20 tarik u bnai Jylliew, 2025 ka la leit ban ïakynduh bad ban aiti da ka dorkhas ha u Chief Engineer ka Tnad Public Health Engineering (PHE) ban pynsngew ba ki paidbah ka shnong Mawlai ki ïoh umbam-umdih tang arsien ha ka shitaïew na uwei u pipe um ba la sam ha kylleng ka nongbah Shillong.
Haba kren sha ki lad pathai khubor, u Bah Samuel Biam kum President, u la ong ba ka shnong Mawlai ka ïoh umbam-umdih tang arsien ha ka shitaïew katba kiwei-kiwei pat ki shnong kiba don shabar jong ka shnong Mawlai, ki ïoh umbam-umdih baroh shitaïew kata ruh bad step bad miet.
U President u la ong ba ka shnong Mawlai ka dei ka shnong kaba heh bad na ka liang ki nongshong-shnong ka Mawlai ruh ki la khmih lynti lah slem bha ban ïoh noh ïa ka jingpynpoi ïa ka umbam-umdih sha ki thliew ïing hynrei ha ka jingïakynduh ïa ki bor ka Tnad PHE pat ki la ai daw ba kane jingbymlah shuh ban pynpoi ïa ka umbam-umdih sha ki thliew ïing ka dei namarba duna palat ka um.
“Haba ngi la tih bniah ïa kane ka kam ka long ba lada ka don ka jingsam ryntih ïa ka um, ka shnong Mawlai wat ïa ka jingpynpoi ïa ka umbam sha ki thliew ïing ruh kin ïoh hynrei namarba ka jingduna ka um, ka la pynlong ïa ka shnong Mawlai ba kin nym ïoh ïa ka jingpynpoi umbam sha ki thliew ïing ruh”, ong u Bah Samuel.
Shuh-shuh, ka Seng ka la ai jingmut sha u Chief Engineer ban ai noh da uwei u pipeline u ban sam um beit tang ïa ka shnong Mawlai namarba ki nongshong shnong ki ïakynduh jingeh shaba palat.
U la ong ruh ba lada na ka liang ka tnad kam leh eiei ban shimkhia halor kane ka kam, ka Seng kan sa shim noh da kiwei ki sienjam bad phah ruh ïa ki nongmihkhmat ban rah noh ïa kane ka jingïakren hapoh ka Ïingdorbar Thawaiñ ka Jylla.
U President u la pyntip ruh ba ki shnong kiba kham shah ktah jur bha na ka jingkyrduh umbam-umdih ki kythup ïa ka shnong Phudmuri, Nongpdeng, Nonglum, Syllaikariah, Motsyiar, Umjaïur, Mawdatbaki, Kynton Massar bad Mawlai Mawroh.
Na ka liang u Chief Engineer u la ong ba un sa khot da ka jingïalang na ka bynta ban pynbeit ïa ka jingeh jong ka shnong Mawlai.
“Lada kim lah ban pynurlong ngim banse ban peit noh da kiwei ki lad ki lynti. Ngi ngeit skhem ba kane ka kam kan urlong bad ngi ap sa tang ïa kata ka por ba ki lah ne em ban pynurlong namarba ngim kwah ba kane ka kam kan long kaba leh shiliang,” ong u Bah Samuel.
