Kohima, Jylliew:
Ki pulit jong ka Nagaland ki ïoh ban kurup ïa u drok ha kiba bun ki jingpyntreikam ba la pynlong ha kylleng ki jaka ha ka taïew ba la lah, ha kaba u drok baroh ba la ïoh ban kurup u la kot sha ka T.15 klur bad kem ïa ki katto katne ngut ki briew kiba donkti ha ka kam khaïi be-aiñ.
Ha ka 12 tarik, Jylliew, ka kynhun jong ka Narcotic Police Station (PS) kaba don hapoh ka Police Headquarter (PHQ) ka la bat ïa kawei ka kali Hyundai i20 bad la ïoh kurup kumba 5.95 kg u drok brown sugar, ba shongdor haduh 6 klur tyngka. Ïa ki song ba la ïoh ban kurup la tah bhah ha kaba la buhrieh ha ka jaka shong jong u nongñiah bad ka jaka shong kaba syndah.
Kine ki arngut ki briew kiba la shahkem ki dei na Rajasthan bad ïa kine la tip kyrteng kum u Durg Singh bad u Matu Singh.
Ha ka jingtohkit kaba nyngkong, la lap ba ïa une u drok la kit na Manipur bad la thmu ban pynpoi sha uwei u briew uba kyrteng u Bharat uba don ha Guwahati, Assam.
Ha ka jingkhynra kaba ar ha ka 14 tarik, Jylliew, ka kynhun Narcotic PS ka la ïoh ban kurup haduh 70 tylli ki song sabon kiba don kumba 739 gram ki jingdih pynbuaid ba la suba ba u dei u Heroin (Shan flower) uba shongdor T.5.17 klur.
Arngut ki briew na Manipur ba la tip kyrteng kum u Visani bad u Th. Pavikho, ki la shahkem. Na ka jingtohkit la lap ïa ka tynrai jong katei ka jingshalan sha uwei u briew uba la tip kyrteng kum u Sani ba la tip kyrteng kum u Kavisii ba la tip kyrteng kum u Kavi, uba sah ha Manipur.
Ka jingkem kaba lai ka la jia ha ka 17 tarik u Jylliew haba ka kynhun Highway Patrol ha Kohima ka la bat ïa kawei ka kali Maruti Baleno bad ki la ïoh kurup 50 tylli ki song sabon kiba don kumba 549 gram u drok Heroin, la antad ba ka shongdor T.3.8 klur. Une u briew uba la tip kyrteng kum u L. Rulu u la shah kem bad la buh jingmudui pyrshah ïa u ha Khuzama Police Station.
Ki heh pulit ki la pynthikna ba ka jingtohkit ka dang ïaid shakhmat ha baroh lai tylli ki jingjia khnang ban lah ban pynduh pyndam noh ïa ka kynhun khaïi drok kaba kham heh kaba treikam ha kylleng ka thaiñ Shatei-Mihngi.
